ബസ്സിറങ്ങിയ യാത്രക്കാരിക്ക് അതേ ബസ്സ് ദേഹത്ത് കയറി ദാരുണാന്ത്യം; നാട്ടുകാർ റോഡ് ഉപരോധിച്ചു

മംഗളൂരു: നഗരത്തിൽ ബെൻഡോർവെൽ ജങ്ഷനിൽ വ്യാഴാഴ്ച വൈകുന്നേരമുണ്ടായ അപകടത്തിൽ യാത്രക്കാരി ചതഞ്ഞരഞ്ഞ് മരിച്ചു. സെന്റ് ആഗ്നസ് സർക്കിളിൽ നിന്ന് മംഗളൂരുവിലേക്ക് വരുകയായിരുന്ന സിറ്റി സർവീസ് ബസ്സ് ഇടിച്ച് ഐറൺ ഡിസൂസയാണ്(65) മരിച്ചത്. സംഭവത്തെത്തുടർന്ന് നാട്ടുകാർ സംഘടിച്ച് കങ്കനടി,ബെൻഡോർവെൽ ജങ്ഷനുകളിൽ റോഡ് ഉപരോധിച്ചു.

റോഡ് മുറിച്ച് കടക്കുന്നതിനിടെ ഐറൺ ഇറങ്ങിയ അതേ ബസ്സ് ഇടിച്ചു വീഴ്ത്തി ദേഹത്ത് കയറിയിറങ്ങുകയായിരുന്നു. തൽക്ഷണം മരണം സംഭവിച്ചു. പുതിയ സിറ്റി പൊലീസ് കമ്മീഷണർ ചുമതലയേറ്റ ശേഷം കങ്കനടി കവലയിൽ സ്ഥാപിച്ച സിഗ്നലുകളുടെ പ്രവർത്തനം ശരിയായ രീതിയിൽ അല്ലെന്ന് നാട്ടുകാർ ആരോപിച്ചു. ട്രാഫിക് പൊലീസ് ഗതാഗതം നിയന്ത്രിക്കാൻ രംഗത്തില്ലാത്തതും അപകടങ്ങൾക്ക് കാരണമാവുന്നു. ഇയാഴ്ച ഈ ജങ്ഷനിൽ ഇത് രണ്ടാമത്തെ അപകടമാണ്.നേരത്തെ ബസ്സ് ഇടിച്ച് തെറിപ്പിച്ചു വീണ് അമ്മയുടെ സ്കൂട്ടറിന് പിറകിൽ സഞ്ചരിച്ച 11 വയസ്സുകാരി മരിച്ചിരുന്നു.

പൊലീസ് കമ്മീഷണർ എത്താതെ പിരിഞ്ഞു പോവില്ലെന്ന് ആൾക്കൂട്ടം പ്രഖ്യാപിച്ചു. എം.എൽ.എ എവിടെ എന്നും ചിലർ ചോദിക്കുന്നുണ്ടായിരുന്നു. അപകടം വരുത്തിയ ബസ്സ് നിറുത്താതെ പോയതാണ് ജനരോഷം വർധിപ്പിക്കാനിടയാക്കിയത്.

ആൾക്കൂട്ടത്തെ പിന്തിരിപ്പിക്കാൻ മുൻ എംഎൽഎ മുഹ്‌യിദ്ദീൻ ബാവ രംഗത്ത് വന്നെങ്കിലും കമ്മീഷണർ വരാതെ പിരിഞ്ഞു പോവാൻ കൂട്ടാക്കിയില്ല. അദ്ദേഹം കമ്മീഷണറെ ഫോണിൽ ബന്ധപ്പെട്ടെങ്കിലും തെരഞ്ഞെടുപ്പുമായി ബന്ധപ്പെട്ട തിരക്കുകൾ കാരണം എത്താനാവില്ലെന്ന് അറിയിച്ചു.തുടർന്ന് കമ്മീഷണറെ സന്ദർശിച്ച ബാവ തിരിച്ചെത്തി. അസി.പൊലീസ് കമ്മീഷണർ മഹേഷ് കുമാർ ഒപ്പമുണ്ടായിരുന്നു. പ്രശ്നങ്ങൾക്ക് പരിഹാരം ഉണ്ടാക്കാം എന്ന ഉറപ്പിൽ ജനങ്ങൾ പിരിഞ്ഞു.