മത്സ്യ തൊഴിലാളിയെ ബസ്സിൽ നിന്ന് ഇറക്കിവിട്ടു; മുഖ്യമന്ത്രി സ്റ്റാലിന്‍റെ ഇടപെടലിൽ ബസ്​ ജീവനക്കാർക്ക്​ സസ്​പെൻഷൻ

നാഗർകോവിൽ: കന്യാകുമാരി ജില്ലയിലെ കുളച്ചൽ ബസ്സ് സ്റ്റാൻഡിൽ വാണിയകുടി സ്വദേശിയായ മത്സ്യ തൊഴിലാളി സ്ത്രീ ശെൽവത്തെ ബസ്സിൽ നിന്ന്​ ഇറക്കി വിട്ടു. ദുർഗന്ധം പരത്തുന്നു എന്ന കാരണം പറഞ്ഞാണ്​ ഡ്രൈവറും കണ്ടക്ടറും ചേർന്ന് സ്​ത്രീയെ ഇറക്കിവിട്ടത്​. സംഭവത്തിൽ പ്രതിഷേധിച്ച്​ മുഖ്യമന്ത്രി സ്റ്റാലിൻ ട്വീറ്റ്​ ചെയ്​തയുടനെ ബസ്​ ജീവനക്കാരെ സസ്​പെന്‍റ്​ ചെയ്​തു. ഉന്നത ഉദ്യോഗസ്​ഥൻ നേരി​ട്ടെത്തി ശെൽവത്തോട്​ മാപ്പു പറയുകയും ​ചെയ്​തു.

സ്​ത്രീകളുടെ ഉന്നമനത്തിനായി സർക്കാർ ബസ്സിൽ അവർക്ക് സൗജന്യ ടിക്കറ്റ് നൽകുന്ന കാലത്ത് അവരെ സർക്കാർ ബസ്സിൽ നിന്ന് ഇറക്കിവിട്ടു എന്ന വാർത്ത വേദനപ്പെടുത്തിയെന്ന്​ മുഖ്യമന്ത്രി സ്റ്റാലിൻ ട്വീറ്റ്​ ചെയ്​തു.

ഉടനെ മന്ത്രി ടി. മനോ തങ്കരാജിന്‍റെ നിർദ്ദേശപ്രകാരം സംഭവം നടന്ന ബസ്സിന്‍റെ ഡ്രൈവർ മൈക്കേൽ, കണ്ടക്ടർ മണികണ്ഠൻ, ടൈം കീപ്പർ ജയകുമാർ എന്നിവരെ തമിഴ്നാട് ട്രാൻസ്പോർട്ട് വകുപ്പ് സർവീസിൽ നിന്ന് സസ്പെന്‍റ്​ ചെയ്തു. തുടർന്ന് തമിഴ്നാട് ട്രാൻസ്പോർട്ടിന്‍റെ കന്യാകുമാരി വിഭാഗം ഡെപ്യൂട്ടി ഡയറക്ടർ ജെറോലിൽ മത്സ്യ മാർക്കറ്റിൽ എത്തി അപമാനത്തിന് ഇരയായ ശെൽവത്തോട് സർക്കാരിന്‍റെ ഖേദം അറിയിച്ചു.

എല്ലാവരും തുല്യരാണെന്ന വിശാല കാഴ്ചപ്പാടിൽ ചിന്തിക്കുകയും പ്രവർത്തിക്കുകയും വേണമെന്നും മുഖ്യമന്ത്രി എം.കെ സ്റ്റാലിൻ ട്വീറ്റ്​ ചെയ്​തു.