ബൈക്ക്​ വാങ്ങിയാൽ ആട്​ ഫ്രീ: ദീപാവലി ഒാഫറുമായി ഹീറോ ഡീലർ; ബുക്കിങ്ങ്​ താങ്ങാതെ ഒാഫർ പിൻവലിച്ചു

ചെന്നൈ:  വിപണികളിൽ വിവിധ തരത്തിൽ ഉത്സവകാല ഒാഫറുകൾ ഉണ്ടാകാറുണ്ട്​. ക്യാഷ് ഡിസ്‍കൗണ്ടും എക്സേഞ്ച് ഓഫറും തുടങ്ങി വേറിട്ട ഓഫറുകളായിരിക്കും പലതും. എന്നാൽ വാഗ്​ദാനം നൽകി ഡീലർ പുലിവാലു പിടിച്ച സംഭവം ആദ്യമായിട്ടായിരിക്കും. തമിഴ്​നാട്ടിലെ ശിവഗംഗ ജില്ലയിലെ ഹീറോ മോട്ടോകോര്‍പ്പ് ഡീലർ  ഗായത്രി മോട്ടോഴ്‌സാണ്​ ഒാഫർ നൽകി കെണിയിലായത്​. 

ഒക്ടോബര്‍ 11 മുതല്‍ 14 വരെ ഹീറോ ബൈക്ക് വാങ്ങുന്ന എല്ലാവര്‍ക്കും ആടിനെ ഫ്രീയായി നല്‍കുമെന്നായിരുന്നു ഓഫര്‍. ഇതോടെ ഡീലര്‍ഷിപ്പിലേക്ക് ഫോണ്‍വിളിയുടെ പ്രവാഹമായിരുന്നു. ആദ്യം ദിനം മാത്രം നൂറോളം ബുക്കിങ് വന്നു. വീണ്ടും ബുക്കിങ്ങ്​ കൂടിയതോടെ ഇത്രയും ആടുകളെ സംഘടിപ്പിക്കാൻ സാധിക്കില്ലെന്നും പണി പാളിയെന്നും ഡീലർക്ക്​ മനസ്സിലായി. 

അപകടം മണത്ത ഡീലര്‍ ഓഫര്‍ പിന്‍വലിച്ചു. ചുരുങ്ങിയ ദിവസങ്ങള്‍ക്കുള്ളില്‍ ഇത്രയധികം ആടുകളെ സംഘടിപ്പിച്ച് ഉപഭോക്താക്കള്‍ക്ക് നല്‍കാന്‍ സാധിക്കാത്തതിനാലാണ് ഓഫര്‍ പിന്‍വലിക്കാന്‍ ഡീലർ നിര്‍ബന്ധിതമായത്. ഇനി ബുക്ക് ചെയ്യുന്നവര്‍ക്ക് എത്രയും പെട്ടെന്ന് മറ്റൊരു ഓഫര്‍ നല്‍കാനുള്ള ശ്രമത്തിലാണ് ഗായത്രി മോട്ടോഴ്‌സ്.