'ഉയർന്ന വിലക്ക്​ ഭൂമി വാങ്ങിക്കൂട്ടുന്നു'; ലാൻഡ്​ ജിഹാദ്​ ആരോപണവുമായി ബി.ജെ.പി

ജയ്​പുർ: രാജസ്​താനിലെ പട്ടണമായ മൽപുരയി​ൽ മുസ്​ലിംകൾ 'ലാൻഡ്​ ജിഹാദ്​' നടത്തുന്നുവെന്ന ആരോപണവുമായി ബി.ജെ.പി എം.എൽ.എ. മൽപുരയിൽ നിന്നുള്ള എം.എൽ.എ കനയ്യ ലാലാണ്​ വെള്ളിയാഴ്ച നിയമസഭയിൽ ഇതുസംബന്ധിച്ച്​ അടിയന്തര പ്രമേയം അവതരിപ്പിച്ചത്​. മൽപുര ഒരു സെൻസിറ്റീവ് പട്ടണമാണെന്നും 1950 മുതൽ നിരന്തരമായി സാമുദായിക സംഘർഷങ്ങൾ ഉണ്ടാവുകയും നൂറിലധികം പേർ മരിക്കുകയും ചെയ്​തിട്ടുണ്ടെന്ന്​ അദ്ദേഹം പറഞ്ഞു.

'മുസ്​ലിം സമൂഹം കാമ്പയിൻ നടത്തുകയാണ്​. ഹിന്ദു സമൂഹത്തിന്‍റെ വീടുകളും ഭൂമിയും സംസ്ഥാന സർക്കാർ നിശ്ചയിച്ച നിരക്കിനേക്കാൾ ഉയർന്ന വിലക്കാണ്​ വാങ്ങുന്നത്​. അനധികൃതമായി വാങ്ങുന്ന ഈ വീടുകളിൽ അവർ താമസിക്കാൻ തുടങ്ങുന്നു. തുടർന്ന് എല്ലാ ദിവസവും ഹിന്ദു അയൽക്കാരെ ഭീഷണിപ്പെടുത്തുകയാണ്​' -കനയ്യ ലാൽ ആരോപിച്ചു.

'ഹിന്ദു പെൺകുട്ടികളെയടക്കം ഇവർ ആക്ഷേപിക്കുന്നുണ്ട്​. ഇത് അരക്ഷിതവും ഭീതിജനകവുമായ അന്തരീക്ഷത്തിലേക്ക് നാടിനെ നയിച്ചു. ഈ ഭാഗത്തുനിന്ന്​ 800ഓളം കുടുംബങ്ങളാണ്​ പലായനം ചെയ്​തത്​. മുസ്​ലിം പ്രദേശത്തോട്​ ചേർന്നുള്ള ഒമ്പത്​ വാർഡുകളിലെ ഭൂരിഭാഗം ഹിന്ദു കുടുംബങ്ങളും പലായനം ചെയ്​തു. മറ്റു രണ്ട്​ വാർഡുകളിൽ ജൈന ക്ഷേത്രങ്ങൾ നിലകൊള്ളുന്നുണ്ട്​. ഇവിടത്തെ വഴികളിൽ അസ്​ഥികൾ ഉപേക്ഷിക്കുകയാണ്​. ചിലർ മൽപുര സബ് ഡിവിഷനൽ മജിസ്‌ട്രേറ്റിനെ സമീപിച്ചെങ്കിലും നടപടിയൊന്നും ഉണ്ടായിട്ടില്ല. ഇത്​ തടയാൻ കർശനമായ നിയമം കൊണ്ടുവരണം' -കനയ്യ ലാൽ നിയമസഭയിൽ പറഞ്ഞു.

മൽപുരയിൽനിന്ന് ഹിന്ദു കുടുംബങ്ങൾ പലായനം ചെയ്യുകയാണെന്ന്​ ആരോപിച്ച് ബി.ജെ.പി സംസ്​ഥാന കമ്മിറ്റിയും രംഗത്തുവന്നിട്ടുണ്ട്​. ഇവിടത്തെ സ്​ഥിതിഗതികൾ മനസ്സിലാക്കാൻ ബി.ജെ.പി അന്വേഷണ സംഘത്തെ നിയോഗിച്ചിരുന്നു.