ഡൽഹി കലാപത്തിന്​ കാരണം സോണിയയും രാഹുലുമടക്കം നടത്തിയ പ്രസംഗമെന്ന് ഹരജി; വിദ്വേഷപ്രസംഗം നടത്തിയിട്ടില്ലെന്ന്​ ഇരുവരും കോടതിയിൽ

ന്യൂഡല്‍ഹി: സോണിയ ഗാന്ധി, രാഹുൽ ഗാന്ധി അടക്കമുള്ളവർ പൗരത്വ ബില്ലിനെതിരെ നടത്തിയ വിദ്വേഷപ്രസംഗങ്ങളാണ്​ 2020ൽ വടക്കുകിഴക്കൻ ഡൽഹിയിലുണ്ടായ കലാപത്തിന്​ കാരണമെന്നും അവർക്കെതിരെ കേസ്​ രജിസ്റ്റർ ചെയ്യാൻ നിർദേശം നൽകണമെന്നും ആവശ്യപ്പെട്ടുള്ള ഹരജിയിൽ ഇരുവരും ഡൽഹി ഹൈകോടതിയിൽ മറുപടി സത്യവാങ്​മൂലം ഫയൽ ചെയ്തു.

തങ്ങളുടെ പ്രസംഗം മതത്തിന്‍റെയോ വർഗത്തിന്‍റെയോ ഭാഷ, ദേശം എന്നിവയുടെ പേരിലോ ജനങ്ങളെ തമ്മിലടിപ്പിക്കാന്‍ വേണ്ടിയായിരുന്നില്ല. സർക്കാർ പാസാക്കിയ ഏതെങ്കിലും ബില്ലിനെതിരെയോ നിയമത്തിനെതിരെയോ സത്യസന്ധമായി അഭിപ്രായം പ്രകടിപ്പിക്കുന്നതിൽനിന്നും അത് പൊതുയിടത്തിൽ ചർച്ച ചെയ്യുന്നതിനും തടയിടുന്നത്​ നമ്മുടെ അഭിപ്രായസ്വാതന്ത്ര്യ ലംഘനമാണെന്നും ​സത്യവാങ്​മൂലത്തിൽ ചൂണ്ടിക്കാട്ടി.

ഹരജിക്കാരന്‍ തങ്ങളെ പ്രത്യേകമായി ലക്ഷ്യംവെക്കുകയാണ്. ഭരണകക്ഷിയില്‍പെട്ട നേതാക്കള്‍ വിദ്വേഷപ്രസംഗം നടത്തിയിട്ടും അവര്‍ക്കെതിരെ കേസെടുക്കണമെന്ന് ഹരജിയിൽ ആവശ്യപ്പെടുന്നില്ലെന്നും ഇരുവരും ചൂണ്ടിക്കാട്ടി.

പൗരത്വ പ്രതിഷേധ കാലയളവിൽ സോണിയ, രാഹുല്‍, പ്രിയങ്ക, മനീഷ് സിസോദിയ, അമാനത്തുല്ല ഖാന്‍, ഹര്‍ഷ് മന്ദര്‍ തുടങ്ങിയവരുടെ പ്രസംഗമാണ്​ ഡൽഹി കലാപത്തിലേക്ക്​ നയിച്ചതെന്നും ഇവർക്കെതിരെ വിദ്വേഷപ്രസംഗത്തിന് കേസ് രജിസ്റ്റര്‍ ചെയ്യാൻ നിര്‍ദേശിക്കണമെന്നും ആവശ്യപ്പെട്ട്​ ലോയേഴ്​സ്​ വോയ്​സ്​ എന്ന സംഘടനയാണ്​ പൊതുതാൽപര്യ ഹരജി ഫയൽ ചെയ്​തത്​.