നദിതീരത്ത്​ സംസ്​കരിച്ച കോവിഡ്​ ബാധിതരുടെ മൃതദേഹങ്ങൾ നായ്​ കടിച്ചുവലിക്കുന്നു; പ്രദേശവാസികളുടെ പ്രതിഷേധം​

ന്യൂഡൽഹി: കോവിഡ്​ ബാധിച്ച്​ മരിച്ചവരുടെ മൃതദേഹങ്ങൾ നായ്​ കടിച്ചുവലിക്കുന്ന ദൃശ്യങ്ങൾ പുറത്ത്​. ഉത്തരാഖണ്ഡ്​ ഉത്തരകാശിയിലെ കേദാർ ഘട്ടിലെ നദീ തീരത്താണ്​ സംഭവം.

നദീതീരത്തുനിന്ന്​ മൃതദേഹങ്ങൾ നീക്കം ചെയ്യാൻ നടപടി സ്വീകരിക്കണമെന്ന്​ പ്രദേശവാസികൾ ജില്ല അധികാരികളോട്​ ആവശ്യപ്പെട്ടു. ഗംഗയുടെ കൈവഴികളിലേക്ക്​ മൃതദേഹം വലിച്ചെറിയുന്നുണ്ടെന്നും അവർ ആരോപിച്ചു.

മണലിനുള്ളിൽ സംസ്​കരിച്ച നിലയിലായിരുന്നു മൃതദേഹങ്ങൾ. കനത്ത മഴ പെയ്​തതോടെ നദിയിലെ വെള്ളം ഉയരുകയും മണ്ണ്​ ഒലിച്ചുപോകുകയും ചെയ്​തു. ഇതോടെ പ്രദേശത്ത്​ ദുർഗന്ധം പരന്നതോടെ നായ്​ക്കളെത്തി മൃതദേഹം മണൽ മാന്തി പുറത്തെടുക്കുകയും ഭക്ഷിക്കുകയുമായിരുന്നുവെന്ന്​ പ്രദേശവാസികൾ പറയുന്നു.

സംഭവത്തിൽ പ്രകോപിതരായ പ്രദേശവാസികൾ നഗര ഭരണകൂടം യാതൊരുവിധ നടപടികളും സ്വീകരിച്ചിട്ടില്ലെന്ന്​ ആരോപിച്ചു.

കേദാർഘട്ടിൽ പകുതി ദഹിപ്പിച്ച മൃതദേഹങ്ങൾ നായ്​ക്കൾ കടിച്ചുവലിക്കുന്നതി​െൻറ ദൃശ്യങ്ങൾ ശ്രദ്ധയിൽപ്പെട്ടു. സംസ്​കാര ചടങ്ങുകൾക്ക്​ ശേഷം പ്രദേശം വൃത്തിയാക്കാൻ ഒരു സന്ന്യാസിയെ നിയോഗിച്ചി​ട്ടു​ണ്ടെന്നായിരുന്നു നഗരപാലിക ചെയർമാൻ രമേശ്​ സെംവാളി​െൻറ പ്രതികരണം.

ഉത്തർപ്രദേശിലെയും ബിഹാറിലെയും നദികളിലൂടെ നിരവധി മൃതദേഹങ്ങൾ ഒഴുകിയിരുന്നു. കോവിഡ്​ ബാധിച്ച്​ മരിച്ചവരുടെ മൃതദേഹങ്ങൾ ബന്ധുക്കൾ നദിയിലൊഴുക്കുകയായിരുന്നുവെന്നാണ്​ ഉയർന്ന ആരോപണം.