വധശിക്ഷ നിയമപരം -​ സുപ്രീംകോടതി

ന്യൂഡൽഹി: വധശിക്ഷ നിയമപരമാണെന്നും അതിൽ സംവാദത്തി​​​െൻറ ആവശ്യമില്ലെന്നും ഒന്നിനെതിരെ രണ്ട്​ ജഡ്​ജിമാരുടെ ഭൂരിപക്ഷത്തിന്​ സുപ്രീംകോടതി വിധിച്ചു. മൂന്നംഗ ബെഞ്ചി​​​െൻറ അധ്യക്ഷനായ മലയാളിയായ ജസ്​റ്റിസ്​ ക​ുര്യൻ ജോസഫ്​ വധശിക്ഷക്ക്​ എതിരായ നിലപാട്​ സ്വീകരിച്ചപ്പോൾ ജസ്​റ്റിസുമാരായ ദീപക്​ ഗുപ്​തയും ഹേമന്ത്​ ഗുപ്​തയും നിയമപുസ്​തകത്തിലെ പരമാവധി ​ശിക്ഷ വിധിക്കാവുന്നതാണെന്ന്​ തീർപ്പ്​ കൽപിക്കുകയായിരുന്നു. വധശിക്ഷക്കായി കേസുകൾ വൈകാരികമാക്കി അന്വേഷണ ഏജൻസികൾ കോടതിക്കുമേൽ സമ്മർദം ചെലുത്തുകയാണെന്ന്​ വിയോജിച്ച ജസ്​റ്റിസ്​ കുര്യൻ ജോസഫ് കുറ്റപ്പെടുത്തി. കുറ്റകൃത്യം തടയുന്നതിൽ വധശിക്ഷ പരാജയ​മാണെന്ന്​ അദ്ദേഹം ന്യൂനപക്ഷവിധി പുറപ്പെടുവിച്ചു.

അതേസമയം, വിധിക്ക്​ നിദാനമായ കേസിൽ പ്രതിയായ ചന്നുലാൽ വർമയുടെ വധശിക്ഷ മൂന്നംഗ ബെഞ്ച്​ ​െഎകകണ്​ഠ്യേന ജീവപര്യന്തം തടവാക്കി മാറ്റുകയും ചെയ്​തു. 2011ൽ മൂന്നുപേരെ കൊലപ്പെടുത്തിയ കേസിലാണ്​ ചന്നുലാൽ വർമക്ക്​ വധശിക്ഷ വിധിച്ചത്​. അതിനെതിരെ സമർപ്പിച്ച അപ്പീൽ സ്വീകരിച്ച മൂന്നംഗബെഞ്ച്​ പ്രതിക്ക്​ മാനസാന്തരം വരുന്നതിന്​ ഇനിയും സാധ്യതയുള്ളതിനാൽ വധശിക്ഷ ഒഴിവാക്കി ജീവപര്യന്തമാക്കി മാറ്റുകയാണെന്ന്​ പറഞ്ഞു.

സമൂഹത്തിലെ കുറ്റകൃത്യങ്ങൾ തടയുന്നതിൽ വധശിക്ഷ രീതി പരാജയപ്പെട്ടുവെന്ന 262ാം നിയമ കമീഷൻ റിപ്പോർട്ട്​ ഉദ്ധരിച്ച​ ജസ്​റ്റിസ്​ കുര്യൻ ജോസഫ്​ വിചാരണ പലപ്പോഴും ​പൊതുജനാഭിപ്രായത്തിന്​ വിധേയമാകുന്നുണ്ടെന്ന്​ വിധിയിൽ ചൂണ്ടിക്കാട്ടി.

ബെഞ്ചിലെ ഏറ്റവും മുതിർന്ന ജഡ്​ജിയുടെ ഇൗ അഭിപ്രായം മറ്റു രണ്ട്​ ജഡ്​ജിമാർ തള്ളിക്കളഞ്ഞു. വധ​ശിക്ഷ ഒരു സംവാദമാക്കേണ്ട ആവശ്യമില്ലെന്ന്​ രണ്ട്​ ജഡ്​ജിമാർക്കും കൂടി വേണ്ടി വിധി വായിച്ച ജസ്​റ്റിസ്​ ദീപക്​ ഗുപ്​ത വ്യക്തമാക്കി. 1980കളിലെ ബച്ചൻ സിങ്​​ മച്ചിസിങ്​​ കേസിൽ വധശിക്ഷ നിയമപരമായ ശിക്ഷയാണെന്ന്​ വിധിച്ചതാണെന്നും ഭൂരിപക്ഷ വിധിപ്രസ്​താവത്തിൽ ഗുപ്​ത തുടർന്നു. ​