രാമക്ഷേത്ര ട്രസ്റ്റ്​ അംഗത്തിനെതിരെ ആരോപണം ഉന്നയിച്ച​ മാധ്യമപ്രവർത്തകനെതിരെ​ കേസെടുത്ത്​ യു.പി പൊലീസ്​

ലഖ്​നോ: അയോധ്യയിലെ രാമക്ഷേത്ര നിർമാണ ട്രസ്റ്റ്​ അംഗത്തിനെതിരെ ആരോപണം ഉന്നയിച്ച മാധ്യമപ്രവർത്തകനെതിരെ കേസെടുത്ത്​ യു.പി ​െപാലീസ്​. ​മാധ്യമപ്രവർത്തകനായ വി​നീത്​ നരേയ്​ൻ കൂടാതെ അൽക ലഹോട്ടി, രജ്​നീഷ്​ എന്നിവർക്കെതിരെയാണ്​ കേസ്​.

ഇന്ത്യൻ ശിക്ഷ നിയമത്തിലെ 15ാം വകുപ്പ്​ പ്രകാരവും ഐ.ടി വകുപ്പ്​ പ്രകാരവുമാണ്​ കേസ്​. ട്രസ്റ്റ്​ അംഗവും വിശ്വ ഹിന്ദു പരിഷത്ത്​ നേതാവുമായ ചംപത്​ റായ്​ക്കെതിരെയായിരുന്നു ബിജ്​നോർ ഭൂമി കൈയേറ്റ ആരോപണം. ചംപത്​ റായ്​യുടെ സഹോദരന്‍റെ പരാതിയിലാണ്​ കേസെടുത്തിരിക്കുന്നത്​.

അഴിമതി ആരോപണത്തിൽ ചംപത്​ റായ്​​ക്കും സഹോദരൻ സജ്ഞയ്​ ബൻസാലിനും പ്രാഥമിക ​അന്വേഷണത്തിന്‍റെ അടിസ്​ഥാനത്തിൽ ബിജ്​നോർ പൊലീസ്​ ക്ലീൻ ചിറ്റ്​ നൽകിയിരുന്നു.

ഭൂമി കുംഭകോണവുമായി ബന്ധപ്പെട്ട്​ റായ്​ക്കെതിരെ തെറ്റായ ആരോപണങ്ങൾ ഉന്നയിച്ചുവെന്നും ഗൂഡാലോചന നടത്തിയെന്നും രാജ്യത്തെ ഹിന്ദുക്കളുടെ വികാരം വ്രണപ്പെടുത്തിയെന്നുമാണ്​ പരാതി.

മൂന്ന്​ ദിവസം മുമ്പ്​ നരേയ്​ൻ, ചംപത്​ റായ്​യും സഹോദരനും ബിജ്​നോറിൽ ഭൂമി പിടിച്ചെടുക്കാൻ ശ്രമിക്കു​ന്നുവെന്ന്​ ഫേസ്​ബുക്കിൽ പോസ്റ്റ് ​ചെയ്​തിരുന്നു. പ്രവാസിയായ അൽക ലഹോട്ടിയുടെ ഉടമസ്​ഥതയിലുള്ള പശു ഫാം അടങ്ങിയ 20,000 ചതുരശ്ര മീറ്റർ വിസ്​തീർണമുള്ള സ്​ഥലം റായ്​യും സഹോദരൻമാരും കൈയേറി. 2018 മുതൽ കൈയേറ്റം ഒഴിപ്പിക്കാൻ ലഹോട്ടി ​ശ്രമിക്കുന്നതായും ഇതിനെതിരെ നടപടിയെടുക്കാൻ യോഗി ആദിത്യനാഥിനോട്​ ആവശ്യപ്പെട്ടിരുന്നതായും പോസ്റ്റിൽ പറയുന്നു. ലഹോട്ടിക്കെതിരെയും പൊലീസ്​ കേസെടുത്തിട്ടുണ്ട്​.

കേസുമായി ബന്ധപ്പെട്ട്​ നരേയ്​നെ ഫോണിൽ ബന്ധപ്പെടാൻ ബൻസാൽ ​ശ്രമിച്ചിരുന്നു. എന്നാൽ ഫോൺ എടുത്തത്​ രജ്​നീഷ്​ എന്ന്​ പരിചയപ്പെടുത്തിയയാളാണെന്നും അയാൾ കൊന്നുകളയുമെന്ന്​ ഭീഷണിപ്പെടുത്തിയതായും ബൻസാലിന്‍റെ പരാതിയിൽ പറയുന്നു. രാമക്ഷേത്ര നിർമാണത്തിന്​ ഭൂമി ഏറ്റെടുക്കലുമായി ബന്ധപ്പെട്ടും ചംപത്​ റായ്​ക്കെതിരെ അഴിമതി ആരോപണങ്ങൾ ഉയർന്നിരുന്നു.