2006ലെ ബോട്ട്​ ദുരന്തത്തിന്‍റെ ചിത്രം വാട്​സ്​ആപ്​ സ്റ്റാറ്റസാക്കി; കശ്​മീർ മാധ്യമപ്രവർത്തകനെതിരെ കേസ്​

ശ്രീനഗർ: ജമ്മു കശ്​മീരിൽ 15 വർഷം മുമ്പുണ്ടായ ബോട്ടപകടം ഓർമിപ്പിച്ച്​ വാട്​സ്​ആപ്​ സ്റ്റാറ്റസിട്ട മാധ്യമ​പ്രവർത്തകനെതിരെ കേസ്​. ബന്ദിപോറ ജില്ലയിലെ പ്രാദേശിക മാധ്യമപ്രവർത്തകനായ സാജിത്​ റെയ്​നക്കെതിരെയാണ്​ കേസ്​.

സമാധാനം തകർക്കൽ, ഭീതി പരത്തുന്നതിനും കലാപത്തിനും കാരണമാകു​ന്നുവെന്നുമുള്ള വകുപ്പുകൾ ചുമത്തിയാണ്​ കേസ്​.

2006ൽ വുളാർ തടാകത്തിൽ ബോട്ട്​ മറിഞ്ഞ്​ 20 കുട്ടികൾ മുങ്ങിമരിച്ചിരുന്നു. അപകടത്തിന്‍റെ ചിത്രങ്ങളുടെ സ്​ക്രീൻ ഷോട്ടാണ്​ സാജിത്​ റെയ്​ന വാട്​സ്​ആപിൽ പ​ങ്കുവെച്ചത്​. 15ാമത്​ വാർഷിക ദിനത്തിലാണ്​ ദുരന്തം ഓർമിപ്പിക്കുന്നതിനായി സ്റ്റാറ്റസ്​ പങ്ക​ുവെച്ചത്​.

'എനിക്കെതിരായ കേസ്​ പിൻവലിക്കണമെന്ന്​ ഞാൻ പൊലീസിനോട്​ അഭ്യർഥിച്ചു. ബോട്ട്​ തകർന്ന്​ മരിച്ച 20 കുട്ടികളെ ഓർമിക്കുന്നതിന്​ വേണ്ടി മാത്രമാണ്​ ചിത്രം സ്റ്റാറ്റസാക്കിയത്​. ആ പോസ്റ്റിന്‍റെ പേരിൽ, അവർ എനിക്കെതിരെ എഫ്​.ഐ.ആർ രജിസ്റ്റർ ചെയ്​തു' -റെയ്​ന പറഞ്ഞു.

അതേസമയം, 23കാരനായ മാധ്യമപ്രവർത്തകനെതിരെ കേസെടുത്തതിനെ പൊലീസ്​ ന്യായീകരിച്ച പൊലീസ്​ മാധ്യ​മപ്രവർത്തകർക്കെതിരായ കേസല്ല രജിസ്റ്റർ ചെയ്​തതെന്ന്​ അറിയിക്കുകയായിരുന്നു.

ബന്ദിപോറ പൊലീസ്​ സ്​റ്റേഷനിൽ സാജിത്​ റെയ്​ന എന്ന വ്യക്തിയുടെ പേരിൽ കേസ്​ രജിസ്റ്റർ ചെയ്​ത​തായും 2021 മേയ്​ 30ലെ വാട്​സ്​ആപ്​ സ്റ്റാറ്റസ്​ പ്രകാരമാണ്​ കേസെടുത്തതെന്നും ജൂൺ നാലിന്​ പൊലീസ്​ ട്വീറ്റ്​ ​െചയ്​തിരുന്നു.

കേസ്​ രജിസ്റ്റർ ചെയ്​തതിന്​ ശേഷം രണ്ടു തവണ സാജിത്​ റെയ്​നയെ പൊലീസ്​ ചോദ്യം ചെയ്യാൻ വിളിപ്പിച്ചിരുന്നു.

കേസ്​ പിൻവലിക്കുമെന്ന്​ ബന്ദിപോറ എസ്​.എസ്​.പി ഉറപ്പുനൽകിയിരുന്നു. തനിക്ക്​ നീതി ലഭിക്കുമെന്നാണ്​ വി​ശ്വാസം. അവർ തന്‍റെ ഭാവിയെയും പ്രഫഷനെയും കുറിച്ച്​ ചിന്തിക്കുമെന്നും എഫ്​.ഐ.ആർ പിൻവലിക്കുമെന്ന്​ ഉറപ്പുള്ളതായും സാജിത്​ റെയ്​ന പറഞ്ഞു.