കൽക്കരി കുംഭകോണം; തൃണമൂൽ നേതാവ്​ അഭിഷേക്​ ബാനർജിയുടെ ഭാര്യക്ക്​ സി.ബി.ഐ നോട്ടീസ്​

കൊൽക്കത്ത: കൽക്കരി കുംഭകോണവുമായി ബന്ധപ്പെട്ട കേസിൽ തൃണമൂൽ നേതാവ്​ അഭിഷേക്​ ബാനർജിയുടെ ഭാര്യ രുജിര ബാനർജിക്ക്​ സി.ബി.​െഎ നോട്ടീസ്​. അന്വേഷണവുമായി സഹകരിക്കണമെന്ന്​ ആവശ്യപ്പെട്ടാണ്​ നോട്ടീസ്​.

അഭിഷേക്​ ബാനർജിയുടെ വീട്ടിൽ സി.ബി.ഐ നേരി​ട്ടെത്തിയാണ്​ നോട്ടീസ്​ കൈമാറിയതെന്ന്​ എൻ.ഡി.ടി.വി റിപ്പോർട്ട്​ ചെയ്​തു. രുജിര വീട്ടിലില്ലാത്തതിനാൽ കുടുംബാംഗങ്ങളെ നോട്ടീസ്​ ഏൽപ്പിച്ചശേഷം മടങ്ങുകയായിരുന്നു. രുജിരയെ വീട്ടിലെത്തി ചോദ്യം ചെയ്​തേക്കുമെന്നാണ്​ വിവരം.

കൽക്കരി മാഫിയ ബംഗാളിലെ തൃണമൂൽ നേതാക്കൾക്ക്​ നിരന്തരം കൈക്കൂലി നൽകിയെന്നതാണ്​ കേസ്​. തൃണമൂൽ യുവജന വിഭാഗം നേതാവായ വിനയ്​ മിശ്ര വഴിയാണ്​ നേതാക്കൾക്ക്​ പണം കൈമാറിയതെന്നാണ്​ ആരോപണം. ഡിസംബർ 31ന്​ വിനയ്​ മിശ്രയുടെ വീട്ടിൽ സി.ബി.ഐ റെയ്​ഡ്​ നടത്തിയിരുന്നു. വിനയ്​ മിശ്ര ഒളിവിലാണ്​. ഇയാൾക്കെതിരെ സി.ബി.ഐ ജാമ്യമില്ല അറസ്റ്റ്​ വാറണ്ടും പുറപ്പെടുവിച്ചിരുന്നു.

ബംഗാളിലെ ഈസ്​റ്റേൺ കോൾഫീൽഡ്​ ലിമിറ്റഡിന്‍റെ കുനുസ്​​േതാരിയ, കജോരിയ കൽക്കരി പാടങ്ങളിൽ അനധികൃത ഖനനം നടത്തിയെന്നും കൽക്കരി മോഷണം നടത്തിയെന്നുമാണ്​ ആരോപണം. ഇതുപ്രകാരം കേന്ദ്രത്തിനും സംസ്​ഥാനത്തിനും കോടികളുടെ നഷ്​ടമുണ്ടാക്കിയെന്നും പറയുന്നു. തുടർന്ന്​ കഴിഞ്ഞവർഷം നവംബറിലാണ്​ സി.ബി.ഐ കേസെടുക്കുന്നത്​.

കൽക്കരി കുംഭകോണ കേസിൽ മുഖ്യമന്ത്രി മമത ബാനർജിയുടെ അനന്തരവൻ അഭിഷേക്​ ബാനർജിക്ക്​ പങ്കുള്ളതായി നേരത്തേ മുതൽ ബി.ജെ.പി ആരോപിച്ചിരുന്നു. 'കൽക്കരി കള്ളൻ' എന്നായിരുന്നു ബി.ജെ.പി അഭി​േഷക്​ ബാനർജിയെ വിശേഷിപ്പിച്ചത്​.

പശ്ചിമബംഗാളിൽ നിയമസഭ തെരഞ്ഞെടുപ്പ്​ അടുത്തിരിക്കെയാണ്​ കേന്ദ്ര ഏജൻസിയുടെ പുതിയ നീക്കം. തൃണമൂലിൽനിന്ന്​ ഭരണം പിടിച്ചെടുക്കാൻ കഴിയുമെന്ന വിശ്വാസത്തിലാണ്​ ബി.ജെ.പി.