ആർ.ജികർ മെഡിക്കൽ കോളജ് മുൻ പ്രിൻസിപ്പൽ സന്ദീപ് ഘോഷിന്റെ വസതിയിൽ സി.ബി.ഐ റെയ്ഡ്

ന്യൂഡൽഹി: ആർ.ജികർ മെഡിക്കൽ കോളജിലെ മുൻ പ്രിൻസിപ്പൽ സ​ന്ദീപ് ഘോഷിന്റെ വസതി ഉൾപ്പടെ 14 സ്ഥലങ്ങളിൽ സി.ബി.ഐ റെയ്ഡ്. അഴിമതി കേസുമായി ബന്ധപ്പെട്ടാണ് സി.ബി.ഐ നടപടി. വിവിധ സ്ഥലങ്ങളിൽ ഇപ്പോഴും സി.ബി.ഐ പരിശോധന പുരോഗമിക്കുകയാണ്.

ആർ.ജികർ മെഡിക്കൽ കോളജിൽ ട്രെയിനി ഡോക്ടർ ബലാത്സംഗത്തിനിരയായി കൊല്ലപ്പെട്ട കേസിൽ സി.ബി.ഐ അന്വേഷണം നടക്കുന്നുണ്ട്. പശ്ചിമബംഗാൾ ഹൈകോടതിയുടെ നിർദേശപ്രകാരമാണ് പ്രത്യേക അന്വേഷണ സംഘത്തിൽ നിന്നും സി.ബി.ഐ കേസ് ഏറ്റെടുത്തത്.

ഈ കേസിനൊപ്പം ആർ.ജികർ മെഡിക്കൽ കോളജിലെ അഴിമതിയുമായി ബന്ധപ്പെട്ട ആരോപണങ്ങളിലും അന്വേഷണം നടത്താൻ സി.ബി.ഐയെ ഹൈകോടതി ചുമതലപ്പെടുത്തിയിരുന്നു. ഈ അന്വേഷണത്തിന്റെ ഭാഗമായാണ് ഇപ്പോൾ സന്ദീപ് ഘോഷുമായി ബന്ധപ്പെട്ട വിവിധ സ്ഥലങ്ങളിൽ സി.ബി.ഐ റെയ്ഡ് നടത്തുന്നത്.

നേരത്തെ ഡോക്ടറുടെ കൊലപാതകവുമായി ബന്ധപ്പെട്ട് ഒമ്പത് ദിവസം സന്ദീപ് ഘോഷിനെ സി.ബി.ഐ ചോദ്യം ചെയ്തിരുന്നു. മുഖ്യപ്രതി സഞ്ജയ് റോയ്, മെഡിക്കല്‍ കോളജ് മുന്‍ പ്രിന്‍സിപ്പല്‍ സന്ദീപ് ഘോഷ്, കൊലപ്പെട്ട ഡോക്ടറുടെ സഹപാഠികളായ നാല് ഡോക്ടർമാർ എന്നിവരെ സി.ബി.ഐ നുണപരിശോധനക്ക് വിധേയമാക്കുകയും ചെയ്തിരുന്നു.