സി.ബി.എസ്​.ഇ പന്ത്രണ്ടാം ക്ലാസ്​ ഇംപ്രൂവ്​മെൻറ്​: വിദ്യാർഥികളുടെ ഉന്നതപഠനം തടസ്സപ്പെടരുത് ​–സുപ്രീംകോടതി

ന്യൂഡൽഹി: ഉന്നതപഠനത്തെ ബാധിക്കുന്നതിനാൽ ഈവർഷം പന്ത്രണ്ടാം ക്ലാസ്​ ഇംപ്രൂവ്​മെൻറ്​ പരീക്ഷ എഴുതിയ വിദ്യാർഥികൾ കുറഞ്ഞ മാർക്ക്​ നേടിയ പ്രശ്​നം ഗൗരവമായി പരിഗണിക്കണമെന്ന്​ സി.ബി.എസ്​.ഇയോട്​ സുപ്രീംകോടതി​. ഇംപ്രൂവ്​മെൻറ്​ പരീക്ഷയെഴുതിയ വിദ്യാർഥികൾക്ക്​ യഥാർഥ മാർക്ക്​ അനുസരിച്ച്​ പ്രവേശനം നേടുന്നതിന്​ തടസ്സമുണ്ടാകരുത്​. തുടർച്ചയായി ഇംപ്രൂവ്​മെൻറ്​ പരീക്ഷകളിൽ തോൽക്കുന്നവരുടെ മുൻ പരീക്ഷഫലം പരിഗണിക്കാമെന്നും അവർക്ക്​ അതിന്​ അവസരം നൽകണമെന്നും എതിർ സത്യവാങ്​മൂലം സമർപ്പിച്ച സെൻട്രൽ ബോർഡ്​ ഓഫ്​ സെക്കൻഡറി എജുക്കേഷനോട്​ ജസ്​റ്റിസുമാരായ എ.എം. ഖാൻവിൽകർ, സി.ടി. രവികുമാർ എന്നിവരടങ്ങിയ ബെഞ്ച്​ നിർദേശിച്ചു.

ഇംപ്രൂവ്​മെൻറ്​ പരീക്ഷയിൽ കുറഞ്ഞ മാർക്ക്​ നേടിയതാണ്​ ബുദ്ധിമു​ട്ടെന്നും അതിനാൽ മുൻഫലമനുസരിച്ച്​ പ്രവേശനം നേടാൻ സ്വാതന്ത്ര്യം നൽകണമെന്നും​ ഹരജിക്കാർക്കുവേണ്ടി ഹാജരായ അഭിഭാഷകൻ വാദിച്ചു. യഥാർഥ ഫലം നിലനിർത്താൻ ബോർഡിന്​ നിർദേശം നൽകണമെന്ന്​ ആവശ്യ​പ്പെട്ട്​ ഈ വർഷം സി.ബി.എസ്​.ഇ 12ാംക്ലാസ്​ ഇംപ്രൂവ്​മെൻറ്​ പരീക്ഷ എഴുതിയ 11 വിദ്യാർഥികളാണ്​ സുപ്രീംകോടതിയെ സമീപിച്ചത്​. പ്രവേശനനടപടികളെ ബാധിക്കുന്നതിനാൽ വിഷയത്തിൽ വേഗം നടപടിയെടുക്കാനും ഇത്​ ഈ തവണ മാത്രമുള്ള താൽക്കാലിക ക്രമീകരണമാണെന്നും സ്​ഥിരമായ നയമല്ലെന്നും സി.ബി.എസ്​.ഇക്കുവേണ്ടി ഹാജരായ അഭിഭാഷകനോട്​ നിർദേശിച്ചു.