'ലക്ഷദ്വീപിന്‍റെ ഭാവി സുരക്ഷിതമാക്കുന്നതാണ്​ പുതിയ നടപടികൾ'; പ്രചരിക്കുന്നത്​ വ്യാജവാർത്തകളെന്ന്​​​ കലക്​ടർ

​​കൊച്ചി: ലക്ഷദ്വീപിലെ നടപടികൾ ദ്വീപ്​ നിവാസികളുടെ ഭാവി സുരക്ഷിതമാക്കാനെന്ന്​ കലക്​ടർ. മദ്യവിൽപനക്കുള്ള അനുമതി വിനോദസഞ്ചാരമേഖലക്ക്​ മാത്രമാണെന്നും കലക്​ടർ എസ്​.അസ്​കർ അലി വാർത്താസമ്മേളനത്തിൽ അറിയിച്ചു. ലക്ഷദ്വീപിൽ നടക്കുന്ന ഒഴിപ്പിക്കലിനെ ന്യായീകരിക്കുന്നതായിരുന്നു കലക്​ടറുടെ വാർത്താസമ്മേളനം. ദ്വീപിൽ നിന്ന്​ പുറത്തുവരുന്ന വാർത്തകൾ കുപ്രചാരണങ്ങൾ ആണെന്നും കലക്​ടർ വിശദീകരിച്ചു. ദ്വീപിന്‍റെ സുരക്ഷയെ കരുതിയാണ്​ പുതിയ നിയമനിർമാണ​ങ്ങളെന്നും അദ്ദേഹം ന്യായീകരിച്ചു.

സക്​ൂൾ വിദ്യാർഥികളുടെ ഉച്ചഭക്ഷണത്തിൽ മാംസാഹാരമുണ്ട്​. ബീഫും ചിക്കനും മാത്രമാണ്​ ഒഴിവാക്കിയത്​. മീനും മുട്ടയും നിലനിർത്തിയിട്ടുണ്ട്​, ഇത്​ നയപരമായ തീരുമാനമാണെന്നും അദ്ദേഹം പറഞ്ഞു. ലക്ഷദീപിലെ അനധികൃത കയ്യേറ്റങ്ങളാണ്​ പൊളിച്ചത്​. ലക്ഷദ്വീപിൽ കുറ്റകൃത്യങ്ങൾ പെരുകി, മയക്കുമരുന്നു കടത്ത്​ വർദ്ധിച്ച​ുവെന്നും അദ്ദേഹം ആരോപിച്ചു.

അഡ്​മിനിസ്​ട്രേറ്ററുടെ നേതൃത്വത്തിൽ ദ്വീപിൽ നടപ്പാക്കാൻ പോകുന്ന വികസനപ്രവർത്തനങ്ങൾ എടുത്തുപറഞ്ഞായിരുന്നു വാർത്താസമ്മേളനം തുടങ്ങിയത്​. കോവിഡ്​ പ്രതിരോധത്തിൽ ഏറ്റവും മികച്ച പ്രകടനം കാ​ഴ്ചവെച്ച പ്രദേശങ്ങളിലൊന്നാണ്​ ലക്ഷദ്വീപ്​. പ്രദേശത്തെ മുഴുവൻ ജനങ്ങൾക്കും ആദ്യ ഡോസ്​ വിതരണം ചെയ്യാനുള്ള വാക്​സിൻ സ്​റ്റോക്കുണ്ട്​. കവരത്തിയിൽ ഓക്​സിജൻ പ്ലാന്‍റും മോഡൽ ഹൈസ്​കൂളും ഒരുക്കും. മികച്ച മത്സ്യഗ്രാമമാക്കി ദ്വീപിനെ മാറ്റുമെന്നും അദ്ദേഹം പറഞ്ഞു. ജില്ലാ പഞ്ചായത്തിന്‍റെ അധികാരം കുറിച്ചിട്ടി​ല്ലെന്നും അദ്ദേഹം വിശദീകരിച്ചു.