സംസ്ഥാനത്തിൻെറ അനുമതിയില്ലാതെ സി.ബി.ഐക്ക്​ കേസെടുക്കാനാവില്ല-സുപ്രീംകോടതി

ന്യൂഡൽഹി: സംസ്ഥാന സർക്കാറിൻെറ അനുമതിയില്ലാതെ സി.ബി.ഐക്ക്​ ഏകപക്ഷീയമായി കേസുകളിൽ ഇടപെടാനാവില്ലെന്ന്​ സുപ്രീംകോടതി. സംസ്ഥാന അനുമതിയില്ലാതെ സി.ബി.ഐയുടെ അധികാരപരിധി ഉയർത്താൻ കേന്ദ്ര സർക്കാറിനും​ കഴിയില്ല. യു.പിയിലെ അഴിമതിയുമായി ബന്ധപ്പെട്ട കേസിലാണ്​ സുപ്രീംകോടതി പരാമർശം.

നിയമമനുസരിച്ച്​ സംസ്ഥാന അനുമതിയില്ലാതെ സി.ബി.ഐക്ക്​ കേസെടുക്കാനാവില്ല. അത്തരം നടപടിയുമായി സി.ബി.ഐ മുന്നോട്ട്​ പോവുകയാണെങ്കിൽ അത്​ ഫെഡറൽ തത്വങ്ങളുടെ ലംഘനമാവുമെന്നും സുപ്രീംകോടതി നിരീക്ഷിച്ചു.സി.ബി.ഐയുടെ അധികാര പരിധി കേന്ദ്രഭരണ പ്രദേശങ്ങൾക്ക്​ അപ്പുറം മറ്റ്​ സംസ്ഥാനങ്ങളിലേക്ക്​ വ്യാപിപ്പിക്കണമെങ്കിൽ അതാത്​ സർക്കാറുകളുടെ അനുമതി വേണം. സി.ബി.ഐയുടെ പ്രവർത്തനങ്ങൾ നിയന്ത്രിക്കുന്ന ഡൽഹി പൊലീസ്​ എസ്​റ്റാബ്ലിഷ്​മെൻറ്​ ആക്​ടിലെ വിവിധ സെക്ഷനുകളിൽ ഇക്കാര്യം വ്യക്​തമായി പറയുന്നുണ്ടെന്നും സുപ്രീംകോടതി വ്യക്​തമാക്കി.

രാജസ്ഥാൻ, പശ്​ചിമബംഗാൾ,ഝാർഖണ്ഡ്​, കേരള, മഹാരാഷ്​ട്ര, ഛത്തീസ്​ഗഢ്​, പഞ്ചാബ്​, മിസോറാം എന്നീ സംസ്ഥാനങ്ങൾ സി.ബി.ഐക്ക്​ കേസുകൾ അന്വേഷിക്കാനുള്ള അനുമതി പിൻവലിച്ചിരുന്നു. ഇതിന്​ പിന്നാലെയാണ്​ സുപ്രീംകോടതിയുടെ സുപ്രധാന പരാമർശം.