ബൂസ്റ്റർ ഡോസ്​ ആവശ്യമാണോയെന്നതിൽ പഠനം തുടങ്ങി കേന്ദ്രസർക്കാർ

ന്യൂഡൽഹി: ബൂസ്റ്റർ ഡോസ്​ ആവശ്യമാണോയെന്നതിൽ പഠനം തുടങ്ങി കേന്ദ്രസർക്കാർ. ട്രാൻസ്​ലാഷ്ണൽ ഹെൽത്ത്​ സയൻസ്​ ആൻഡ്​ ടെക്​നോളജി ഇൻസ്റ്റിറ്റ്യൂട്ടാണ്​ ഇതുസംബന്ധിച്ച പഠനം നടത്തുന്നതെന്ന് ന്യൂസ്​ 18 റിപ്പോർട്ട്​ ചെയ്തത്​. കോവിഷീൽഡ്​, കോവാക്സിൻ, സ്പുട്​നിക് എന്നിവയുടെ രണ്ട്​ ഡോസ്​ വാക്സിൻ സ്വീകരിച്ച 3000 പേരിലാണ്​ പഠനം. ​

ടി ആൻഡ്​​ ബി സെൽ ആന്‍റിബോഡികളെ കുറിച്ച്​ പഠനം നടത്തി ആറ്​ മാസത്തിന്​ ശേഷമുള്ള വാക്​സിന്‍റെ പ്രതിരോധശേഷി അളക്കുകയാണ്​ ചെയ്യുക. ഇതിന്‍റെ അടിസ്ഥാനത്തിൽ ബൂസ്റ്റർ ഡോസ്​ വേണോയെന്നതിൽ തീരുമാനമെടുക്കും. ബൂസ്റ്റർ ഡോസിന്‍റെ കാര്യത്തിൽ മോദി സർക്കാർ ഇതുവരെ തീരുമാനമെടുത്തിട്ടില്ല.

40 വയസിന്​ മുകളിലുള്ളവർ, 40 വയസിന്​ താഴെയുള്ളവർ എന്നിങ്ങനെ രണ്ട്​ വിഭാഗങ്ങളായി ആളുകളെ തരംതിരിച്ചാണ്​ പഠനം നടത്തുന്നത്​. ലോകത്ത്​ പല രാജ്യങ്ങളും ബൂസ്റ്റർ ഡോസ്​ നൽകാൻ ആരംഭിച്ചിട്ടുണ്ട്​. ഇസ്രായേൽ നാലാമത്തെ ഡോസ്​ വാക്സിൻ നൽകാനും തുടങ്ങി. അതേസമയം ബൂസ്റ്റർ ഡോസ്​ നൽകുന്നതിനെ ലോകാരോഗ്യസംഘടന എതിർക്കുകയാണ്​.