ജമ്മുകശ്​മീരിന് വീണ്ടും​ സംസ്ഥാന പദവി നൽകാൻ സാധ്യത; ജൂൺ 24ലെ യോഗത്തിൽ ചർച്ചയുണ്ടായേക്കും

ന്യൂഡൽഹി: ജമ്മുകശ്​മീരിന്​ വീണ്ടും സംസ്ഥാന പദവി നൽകിയേക്കുമെന്ന്​ സൂചന. ന്യൂസ്​ 18 ചാനലാണ്​ ഇതുസംബന്ധിച്ച വാർത്ത പുറത്ത്​ വിട്ടത്​. ഇക്കാര്യത്തിൽ ജൂൺ 24ന്​ നടക്കുന്ന കശ്​മീരിലെ രാഷ്​ട്രീയപാർട്ടികളുടെ യോഗത്തിൽ ചർച്ചയുണ്ടാകുമെന്നാണ്​ റിപ്പോർട്ട്​.

അതേസമയം, ജമ്മുകശ്​മീരിനുണ്ടായിരുന്ന പ്രത്യേക പദവി തിരികെ നൽകില്ലെന്നാണ്​ റിപ്പോർട്ടുകൾ. സംസ്ഥാന പദവി പുനഃസ്ഥാപിക്കുന്നതുമായി ബന്ധപ്പെട്ട്​ ​പ്രധാനമന്ത്രി മോദിയും ആഭ്യന്തര മന്ത്രി അമിത്​ ഷായും ദേശീയ സുരക്ഷ ഉപദേഷ്​ടാവ്​ അജിത്​ ഡോവലുമായി ചർച്ച നടത്തിയെന്നാണ്​ വാർത്തകൾ.

2019 ആഗസ്​റ്റ്​ അഞ്ചിനാണ്​ ജമ്മുകശ്​മീരി​െൻറ പ്രത്യേക പദവി കേന്ദ്രസർക്കാർ എടുത്ത്​ കളഞ്ഞത്​. ആർട്ടിക്കൾ 370 പ്രകാരം കശ്​മീരിന്​ ലഭിക്കുന്ന പ്രത്യേക അവകാശങ്ങളാണ്​ ഇല്ലാതാക്കിയത്​. പിന്നീട്​ ജമ്മുകശ്​മീർ, ലഡാക്ക്​ എന്നിങ്ങനെ രണ്ട്​ കേന്ദ്രഭരണ പ്രദേശങ്ങളാക്കുകയും ചെയ്​തിരുന്നു. ഇതിനെതിരെ ജമ്മുകശ്​മീരിൽ നിന്ന്​ വലിയ പ്രതിഷേധമാണ്​ ഉയർന്നു വന്നത്​.