ബംഗാളിൽ ഭരണമാറ്റം അനിവാര്യം, അഴിമതിയും പ്രീണനവും വർധിച്ചു -ഹർഷവർധൻ

കൊൽക്കത്ത: പശ്ചിമ ബംഗാളിൽ ഭരണമാറ്റം അനിവാര്യമാണെന്ന്​ കേന്ദ്ര ആരോഗ്യ മന്ത്രി ഹർഷവർധൻ. സംസ്​ഥാനത്ത്​ ബി.ജെ.പിയുടെ രഥയാത്ര ഈ പ്രക്രിയക്ക്​ ശക്തി പകർന്നുവെന്നും അദ്ദേഹം പറഞ്ഞു.

സംസ്​ഥാനത്ത്​ അഴിമതിയും പ്രീണനവും വർധിച്ചുവരുന്നു. കഴിഞ്ഞ ഒരു വർഷമായി വിവിധയിടങ്ങളിൽ നിന്ന്​ ലഭിച്ച പ്രതികരണങ്ങൾ സൂചിപ്പിക്കുന്നത്​ ബംഗാളിലെ ഭരണമാറ്റമാണ്​. ബന്ധുക്കളുടെ ഭരണത്തിൽ ജനങ്ങൾ മടുപ്പ്​ പ്രകടിപ്പിച്ച്​ തുടങ്ങി​യെന്നും അദ്ദേഹം പറഞ്ഞു.

ബംഗാൾ മുഖ്യമന്ത്രി മമത ബാനർജിക്കും ബന്ധുവും തൃണമൂൽ കോൺഗ്രസ്​ എം.പിയുമായ അഭിഷേക്​ ബാനർജിക്കുമെതിരെയായിരുന്നു പേരെടുത്ത്​ പറയാതെയുള്ള വിമർശനം. അഭി​േഷക്​ ബാനർജിക്ക്​ നിരവധി അഴിമതികളിൽ പങ്കുണ്ടെന്നും അദ്ദേഹം ആരോപിച്ചു.

ഏ​പ്രിൽ -മെയ്​ മാസങ്ങളിൽ നടക്കുന്ന ബംഗാൾ നിയമസഭ തെരഞ്ഞെടുപ്പിൽ ഭരണം പിടിക്കുകയാണ്​ ബി.ജെ.പിയുടെ ലക്ഷ്യം. മുതിർന്ന ബി.ജെ.പി നേതാക്കളായ അമിത്​ ഷാ, ജെ.പി. നഡ്ഡ തുടങ്ങിയവർ ഇതിനു​മുന്നോടിയായി ബംഗാളിലെത്തി. നഡ്ഡയുടെ നേതൃത്വത്തിൽ സംസ്​ഥാനത്ത്​ ഇപ്പോൾ രഥയാത്ര സംഘടിപ്പിച്ച്​ വരികയാണ്​.