ബ്രാഹ്​മണർക്കെതിരായ പരാമർശം; ഛത്തീസ്​ഗഢ്​ മുഖ്യമന്ത്രി ഭൂപേഷ്​​ സിങ്​ ബാഘേലിന്‍റെ പിതാവിന്​ ജാമ്യം

ന്യൂഡൽഹി: ബ്രാഹ്​മണർക്കെതിരായ പരാമർശവുമായി ബന്ധപ്പെട്ട​ കേസിൽ അറസ്റ്റിലായ ഛത്തീസ്​ഗഢ്​ മുഖ്യമന്ത്രി ഭൂപേഷ്​​ സിങ്​ ബാഘേലിന്‍റെ പിതാവിന്​ ജാമ്യം.​ റായ്​പൂർ കോടതിയാണ് നന്ദകുമാർ ബാഘേലിന്​ ജാമ്യം അനുവദിച്ചത്​.

റായ്​പൂർ പൊലീസാണ് ഭൂപേഷ്​​ സിങ്​ ബാഗലിന്‍റെ പിതാവ്​​ നന്ദ കുമാർ ബാഘേലിനെ ഈ ആഴ്ച അറസ്റ്റ്​​ ചെയ്​തത്​. അറസ്റ്റിലായ ശേഷം നന്ദകുമാർ ജാമ്യത്തിന്​ അപേക്ഷിച്ചിരുന്നില്ല. ​അദ്ദേഹത്തെ പിന്നീട് കോടതിയിൽ ഹാജരാക്കി 15 ദിവസത്തെ ജുഡീഷ്യൽ കസ്റ്റഡിയിൽ വിട്ടു. പിന്നാലെയാണ്​ നന്ദകുമാറിന്‍റെ അഭിഭാഷകൻ ഗജേന്ദ്ര സോൻകാർ ജാമ്യാപേക്ഷ നൽകിയത്​. മൂന്ന്​ ദിവസമാണ്​ അദ്ദേഹം ജയിലിൽ കഴിഞ്ഞത്​.

ബ്രാഹ്​മണ സമൂഹം നൽകിയ പരാതിയുടെ അടിസ്ഥാനത്തിൽ നന്ദകുമാർ ബാഘേലിനെതിരെ ഡി.ഡി നഗർ പൊലീസാണ്​ കേസെടുത്തത്​. ബ്രാഹ്​മണർ വിദേശത്ത്​ നിന്നും വന്നതാണെന്നും പരിഷ്​കരണത്തിന്​ അവർ തയാറാകണമെന്നും അല്ലെങ്കിൽ ഗംഗയിൽ നിന്നും വോൾഗയിലേക്ക്​ പോകാമെന്നുമായിരുന്നു നന്ദ കുമാറിന്‍റെ പരാമർശം.

ആരും നിയമത്തിന്​ മുകളിലല്ലെന്നായിരുന്നു പിതാവിന്‍റെ പരാമർശത്തോടുള്ള ഛത്തീസ്​ഗഢ്​ മുഖ്യമന്ത്രിയുടെ മറുപടി. പിതാവിനെ താൻ ബഹുമാനിക്കുന്നു. എന്നാൽ പൊതുക്രമത്തെ തകർക്കുന്ന തെറ്റുകൾ വെച്ചുപൊറുപ്പിക്കാനാവില്ല. ആരും നിയമത്തിന്​ മുകളിലല്ലെന്നും അദ്ദേഹം പറഞ്ഞിരുന്നു.