ഗ്യാൻവാപി ഹരജി ഇന്ന് കേൾക്കാമെന്ന് ചീഫ് ജസ്റ്റിസ് ചന്ദ്രചൂഡ്

ന്യൂഡൽഹി: ഗ്യാൻവാപി മസ്ജിദിലെ വുദുഖാനയിലെ ജലധാര ശിവലിംഗമായതിനാൽ കൂടുതൽ സംരക്ഷണം വേണമെന്ന ഹരജി അടിയന്തരമായി പരിഗണിക്കാമെന്ന് ചീഫ് ജസ്റ്റിസ് ഡി.വൈ. ചന്ദ്രചൂഡ്. കേസിൽ സംഘ് പരിവാർ പക്ഷത്തുള്ള അഡ്വ. വിഷ്ണുശങ്കർ ജെയിൻ വ്യാഴാഴ്ച വിഷയം ഉന്നയിച്ചപ്പോഴാണ് അടിയന്തരമായി വെള്ളിയാഴ്ച തന്നെ കേൾക്കാമെന്ന് ചീഫ് ജസ്റ്റിസ് അറിയിച്ചത്.

പള്ളിയിലെ വുദുഖാനയിലുള്ളത് ജലധാരയാണെന്നും ശിവലിംഗമാണെന്ന വാദം കേട്ട് സംരക്ഷണം നൽകി ഗ്യാൻവാപി പള്ളിയിലെ തർക്കത്തിന് തുടക്കമിടരുതെന്നുമുള്ള അഞ്ജുമൻ ഇൻതിസാമിയ മസ്ജിദ് കമ്മിറ്റിയുടെ അപേക്ഷ തള്ളിയ ചീഫ് ജസ്റ്റിസ് ചന്ദ്രചൂഡ് മേയ് 17നാണ് ആദ്യ സംരക്ഷണ ഉത്തരവ് പുറപ്പെടുവിച്ചത്.