ചൗഹാൻ നിരാഹാരം​ അവസാനിപ്പിച്ചു

ഭോപാൽ: മധ്യപ്രദേശ്​ മുഖ്യമന്ത്രി ശിവ്​രാജ്​ സിങ്​ ചൗഹാൻ 28 മണിക്കൂർ നീണ്ട സമാധാന നിരാഹാരം അവസാനിപ്പിച്ചു. കർഷകരുടെ ആവശ്യങ്ങൾ പരിഗണിക്കാമെന്നും കർഷക പ്രശ്​നങ്ങളിൽ ഉടൻ നടപടി എടുക്കാമെന്നും ഉറപ്പു നൽകിക്കൊണ്ടാണ്​ നിരാഹാരം അവസാനിപ്പിച്ചത്​. ഭാരതീയ കിസാൻ സംഘവും മറ്റു കർഷക ഗ്രൂപ്പുകളും തങ്ങൾക്ക്​ നല്ല പിന്തുണ നൽകിയെന്നും താൻ അവ​രോട്​ കടപ്പെട്ടിരിക്കുന്നുവെന്നും പിന്നീട്​ ചൗഹാൻ ട്വീറ്റ്​ ചെയ്​തു. 

കർഷകരു​ടെ അധ്വാനം വെറുതെയാകില്ലെന്ന്​ പറഞ്ഞ മുഖ്യമന്ത്രി  കാർഷിക ഉത്​പന്നങ്ങൾ കർഷകരിൽ നിന്ന്​ നേരിട്ട്​ സർക്കാർ വാങ്ങാമെന്നും അറിയിച്ചു. എന്നാൽ വായ്​പ എഴുതി തള്ളുന്നതിനെ കുറിച്ച്​ ഒരു ഉറപ്പും നൽകിയിട്ടില്ല. എഴുതി തള്ളുകയാണെങ്കിൽ ആറു ലക്ഷത്തിലേറെ കർഷകർക്ക്​ ഉപകാരപ്രദമാകുന്ന നടപടിയായിരിക്കുമത്​. പലിശയില്ലാത്ത വായ്​പ കർഷകർക്ക്​ നൽകുന്നതിനാൽ വായ്​പ എഴുതി തള്ളാനാകില്ലെന്ന്​ നേരത്തെ കൃഷി മന്ത്രി അറിയിച്ചിരുന്നു. 

കർഷക പ്രക്ഷോഭത്തിനു നേരെ പൊലീസ്​  വെടിയുതിർത്ത സംഭവത്തിൽ കുറ്റക്കാർക്കെതിരെ നടപടി എടുക്കുമെന്നും ചൗഹാൻ കർഷകർക്ക്​ ഉറപ്പു നൽകി. 

നേരത്തെ, നിരാഹാരം അവസാനിപ്പിക്കാൻ ചൗഹാനോട്​ കർഷക കുടംബങ്ങൾ​ ആവശ്യ​പ്പെട്ടിരുന്നു. അവരുടെ ഗ്രാമം സന്ദർശിക്കാനും കർഷകർ ആവശ്യ​പ്പെട്ടിരുന്നതായി മുഖ്യമന്ത്രി മാധ്യമങ്ങളോട്​ പറഞ്ഞു.  അവർക്ക്​ വേണ്ടി ചെയ്യാൻ കഴിയുന്നതെല്ലാം തങ്ങൾ ചെയ്യും. സമാധാനം പുനഃസ്​ഥാപിക്കപ്പെടുമെങ്കിൽ അടുത്ത നടപടി തീരുമാനിക്കുമെന്നും ചൗഹാൻ പറഞ്ഞിരുന്നു. 

കർഷക പ്രക്ഷോഭം ശക്​തമായ മധ്യപ്രദേശിൽ സമാധാനം പുഃസ്​ഥാപിക്കാനെന്ന പേരിലാണ്​ ഭോപാൽ ദസ്​റ മൈതാനത്ത്​ രണ്ടു ദിവസമായി മുഖ്യമ്രന്തി ശിവരാജ്​ സിങ്​ ചൗഹാൻ നിരാഹാരമിരുന്നത്​​. കാർഷിക വായ്​പ എഴുതി തള്ളണം. കാർഷിക ഉത്​പന്നങ്ങൾക്ക്​ താങ്ങുവില നൽകണം എന്നീ ആവശ്യങ്ങളുന്നയിച്ചാണ്​​ ദിവസങ്ങളായി മധ്യപ്രദേശിലെ മന്ത്​സൗറിൽ കർഷകർ പ്രക്ഷോഭം നടത്തുന്നത്​​. കർഷക സമരത്തിനു ​​നേരെയുണ്ടായ പൊലീസ്​ വെടിവെപ്പിൽ ആറു കർഷകർ മരിച്ചിരുന്നു. അതോടെ പ്രക്ഷോഭം അനിയന്ത്രിതമായി. തുടർന്നാണ്​ സംസ്​ഥാനത്ത്​ സമാധാനം സ്​ഥാപിക്കാൻ അനിശ്​ചിതകാല നിരാഹാരമിരിക്കുകയാണെന്ന്​ കഴിഞ്ഞ ദിവസം​  മുഖ്യമന്ത്രി പ്രഖ്യാപിച്ചത്​.