ഭീകരരെന്ന്​ മുദ്രകുത്തി ജയിലിലടച്ച ഇല്യാസും ഇർഫാനും ചോദിക്കുന്നു; ' ഞങ്ങൾക്ക്​ നഷ്​ടപ്പെട്ട 9 വർഷങ്ങൾ ആരു നൽകും?'

മുംബൈ: ഒൻപത്​ വർഷത്തെ ജയിൽ വാസത്തിന്​ ശേഷം ചൊവ്വാഴ്ച രാത്രിയാണ്​ മുഹമ്മദ്​ ഇല്യാസും (38), മുഹമ്മദ്​ ഇർഫാനും (33) പുറത്തിറങ്ങിയത്​. യു.എ.പി.എ അടക്കമുള്ള കുറ്റങ്ങൾ ചുമത്തപ്പെട്ട്​ ജയിലിലായിരുന്ന ഇരുവരും നന്ദഡിലെ വീട്ടിൽ തിരിച്ചെത്തിയ ശേഷം പറഞ്ഞത്​ ഇത്രമാത്രം: ''ഞങ്ങളുടെ ഒൻപത്​ വർഷങ്ങൾ വെറും വായുവായിരിക്കുന്നു''.

2012 ൽ നന്ദഡിൽ വെച്ചാണ്​ ഇല്യാസിനെയും ഇർഫാനെയും മഹാരാഷ്​ട്ര തീവ്രവാദ വിരുദ്ധ സ്​ക്വാഡ് (എ.ടി.എസ്​)​ അറസ്റ്റ്​ ചെയ്​തത്​. മാധ്യമ പ്രവർത്തകരും രാഷ്​ട്രീയക്കാരും പൊലീസ്​ ഉദ്യോഗസ്ഥരും അടക്കമുള്ള​വരെ കൊല്ലാനുള്ള ലഷ്​കറെ ത്വയ്​ബയുടെ ഗൂഢാലോചനയിൽ പങ്കു​ണ്ടെന്ന്​ ആരോപിച്ചാണ്​ അറസ്റ്റ്​ ചെയ്​തത്​. എന്നാൽ ഇരുവർക്കുമെതിരെ യാതൊരു തെളിവുകളു​മില്ലെന്ന്​ ചൂണ്ടിക്കാട്ടി പ്രത്യേക കോടതി ചൊവ്വാഴ്ച​ ഇരുവരെയും വെറുതെ വിടുകയായിരുന്നു. അപ്പോ​േഴക്കും ഇരുവർക്കും ഒൻപത്​ വർഷങ്ങൾ നഷ്​ടമായിരുന്നു. ഇരുവർക്കൊപ്പം അറസ്റ്റിലായ മുഹമ്മദ്​ അക്രം, മുഹമ്മദ്​ മുസമ്മിൽ, മുഹമ്മദ്​ സാദിഖ്​​ എന്നിവരെ യു.എ.പി.എ നിയമപ്രകാരം പത്തുവർഷം തടവിലിടാനും വിധിയുണ്ട്​.

അറസ്റ്റിലാകുന്നതിന്​ മുമ്പ്​ ഇല്യാസ്​ നന്ദഡിൽ പഴക്കച്ചവടക്കാരനായിരുന്നു. ഇർഫാൻ ബാറ്ററി ഷോപ്പുടമയും. ഒൻപത്​ വർഷത്തിനിടെ ജാമ്യത്തിനായി നിരവധി തവണ അപേക്ഷിച്ചിരുന്നു. എ.ടി.എസിനും എൻ.ഐ.എക്കും ഇരുവർക്കുമെതിരെ തെളിവുകളൊന്നും ഹാജരാക്കാനായില്ല. 2019ൽ ഇർഫാന്​ ബോംബെ ഹൈകോടതി ജാമ്യം അനുവദിച്ചിരുന്നു. എന്നാൽ നാലുമാസത്തിന്​ ശേഷം സുപ്രീംകോടതി വിധി സ്​റ്റേ ചെയ്​തതോടെ വീണ്ടും അഴിക്കുള്ളിലായി.

ഇർഫാനും ഇല്യാസിനുമായി കേസ്​ നടത്തിയത്​ ജംഇയ്യത്തുൽ ഉലമായേ മഹാരാഷ്​ട്രയാണ്​. ''ജാമ്യം നേടിയ ശേഷം ഞാൻ പുതുജീവിതം പടുത്തുയർത്താനുള്ള ശ്രമത്തിലായിരുന്നു. ഇനിയൊരിക്കലും ജയിലിലേക്ക്​ പോകേണ്ടി വരില്ലെന്ന്​ കരുതി. എന്നാൽ സംഭവിച്ചത്​ മറ്റൊന്നായിരുന്നു. ജാമ്യത്തിന്​ ശേഷമുള്ള 18 മാസങ്ങൾ അതിനുമുമ്പുള്ള ഏഴ്​ വർഷ​ങ്ങളേക്കാൾ കഠിനമായിരുന്നു'' -ഇർഫാൻ പറഞ്ഞു.

ഇല്യാസ്​ അറസ്റ്റിലാകു​േമ്പാൾ ചെറിയ കുഞ്ഞിന്​ രണ്ട്​ ആഴ്ചത്തെ പ്രായം മാത്രമേ ഉണ്ടായിരുന്നുള്ളൂ. ഒൻപത്​ വർഷത്തിനിടയിൽ ഭാര്യയേയും മൂന്നുകുഞ്ഞുങ്ങളേയും ഒരേ ഒരു തവണ ജയിലിൽ വെച്ചുമാത്രമാണ്​ ഇല്യാസ്​ കണ്ടത്​. ''യാതൊരു തെളിവുമില്ലെന്ന്​ അറിയാമായിരുന്നു. പക്ഷേ കേസ്​ നടത്താനുള്ള സാമ്പത്തികം എനിക്കില്ലായിരുന്നു. ഈ ജാമ്യം നേരത്തേ കിട്ടിയിരുന്നെങ്കിൽ എനിക്ക്​ ഒരു പാട്​ വർഷങ്ങൾ നഷ്​ടമാകില്ലായിരുന്നു'' -ഇല്യാസ്​ പറഞ്ഞു നിർത്തി.

കടപ്പാട്​ -ഇന്ത്യൻ എക്​സ്​പ്രസ്​