ശി​രോ​വ​സ്ത്ര വി​വാ​ദ​ത്തി​ന്‍റെ മ​റ​വി​ൽ മുസ്​ലിം വിദ്യാർഥികളുടെ വിവരം ശേഖരിക്കുന്നു

ബംഗളൂരു: ശിരോവസ്ത്ര വിവാദത്തിന്‍റെ മറവിൽ കർണാടകയിലെ മുസ്​ലിം വിദ്യാർഥികളുടെ വിവരം ബി.ജെ.പി സർക്കാർ ശേഖരിക്കുന്നു. സ്വകാര്യ- സർക്കാർ വിദ്യാലയങ്ങളിലെ മുസ്​ലിം വിദ്യാർഥികളെക്കുറിച്ചുള്ള വിവരങ്ങളാണ്​ ശേഖരിക്കുന്നത്​.

ഹൈകോടതിയിൽ ശിരോവസ്ത്രവുമായി ബന്ധപ്പെട്ട ഹരജിയിൽ വാദം നടക്കുന്ന പശ്ചാത്തലത്തിൽ നിയമസഭയിൽ ജനപ്രതിനിധികൾ ആവശ്യപ്പെട്ടാൽ നൽകാനാണ്​ വിവരശേഖരണമെന്നാണ്​ വിദ്യാഭ്യാസ വകുപ്പ്​ ഉദ്യോഗസ്ഥരുടെ ന്യായീകരണം.

ശിരോവസ്ത്രം നിഷേധിക്കുന്നതിന്‍റെ പേരിൽ വിദ്യാലയങ്ങളിൽനിന്ന്​ വീട്ടി​ലേക്ക്​ മടങ്ങുന്ന വിദ്യാർഥികളുടെ എണ്ണം മാധ്യമങ്ങളിൽ തെറ്റായാണ്​ വരുന്നതെന്നും അതുസംബന്ധിച്ച്​ വ്യക്തത വരുത്താനാണ്​ വിവരം ശേഖരിക്കുന്നതെന്നുമായിരുന്നു പ്രൈമറി ആൻഡ്​ സെക്കൻഡറി വിദ്യാഭ്യാസ മന്ത്രി ബിസി. നാഗേഷിന്‍റെ പ്രതികരണം. ശി​രോവസ്ത്ര വിവാദം യഥാർഥത്തിൽ എത്ര കുട്ടികളെയാണ്​ ബാധിച്ചതെന്നും എത്ര കുട്ടികൾ ക്ലാസിൽ ഹാജരാവുന്നുണ്ടെന്നും ഉറപ്പുവരുത്തേണ്ടതുണ്ടെന്നും മന്ത്രി വ്യക്തമാക്കി. എന്നാൽ, ശിരോവസ്​ത്ര സമരത്തിന്‍റെ പശ്ചാത്തലത്തിൽ മുസ്​ലിം വിദ്യാർഥികളുടെ പ്രാതിനിധ്യം കണക്കാക്കി കോളജുകളെ സെൻസിറ്റിവ്​ മേഖലയിൽ ഉൾപ്പെടുത്തുന്നതിന്​ മുന്നോടിയായാണ്​ നടപടിയെന്നാണ്​ വിവരം.

ഹൈ​കോടതിയുടെ ഇടക്കാല ഉത്തരവിന്​ പിന്നാലെ ശിരോവസ്ത്രത്തിന്‍റെ പേരിൽ സംസ്ഥാനത്തെ 14 വിദ്യാലയങ്ങളിലായി 162 വിദ്യാർഥികളെ വീട്ടിലേക്ക്​ മടക്കിയതായാണ്​ പൊതുവിദ്യാഭ്യാസ വകുപ്പിന്‍റെ കണക്ക്​.

ബിദറിൽ മാത്രം ഏഴു വിദ്യാലയങ്ങളിലായി 114 പേരെയും ശിവമൊഗ്ഗയിൽ മൂന്നു സ്ഥാപനങ്ങളിലായി 20 പേരെയും ചിത്രദുർഗയിൽ രണ്ട്​ സ്കൂളുകളിലായി 18 പേരെയും ചിക്കമഗളൂരുവിലെ ഒരു സ്​കൂളിൽ എട്ടുപേരെയും ചിക്കബല്ലാപൂരിൽ രണ്ടുപേരെയും കാമ്പസിൽ കയറാൻ അനുവദിച്ചില്ലെന്നാണ്​ ഔദ്യോഗിക കണക്ക്​.

അതേസമയം, വിദ്യാർഥി പ്രതിഷേധത്തെ ചുരുക്കിക്കാട്ടുന്നതാണ്​​ സർക്കാർ കണക്ക്​. സംസ്ഥാനത്തെ മിക്ക ജില്ലകളിലും ശിരോവസ്ത്രത്തിന്‍റെ പേരിൽ വിദ്യാർഥികളെ കാമ്പസിൽ തടയുകയും പ്രതിഷേധം അരങ്ങേറുകയും ചെയ്യുമ്പോഴും പത്തോളം വിദ്യാലയങ്ങളിൽ മാത്രമാണ്​ പ്രതിഷേധമെന്നാണ്​ വിദ്യാഭ്യാസ മന്ത്രിയുടെ പ്രതികരണം. പ്രതിഷേധത്തിന്​ തുടക്കം കുറിച്ച ഉഡുപ്പി ജില്ല കൂടാതെ, കുടക്​, ഗദക്​, തുമകുരു, ബെളഗാവി, വിജയപുര, ബെള്ളാരി, ഹാസൻ, മാണ്ഡ്യ, കലബുറഗി തുടങ്ങിയ ജില്ലകളിലെ പ്രതിഷേധമൊന്നും വിദ്യാഭ്യാസ വകുപ്പിന്‍റെ കണക്കിലില്ല.