പരിശീലകൻ വസീം ജാഫറുടെ രാജിക്കു പിന്നാലെ ഉത്തരാഖണ്​ഡ്​ ക്രിക്കറ്റിൽ ആളിക്കത്തി വർഗീയത വിവാദം

മുംബൈ: മുൻ ഇന്ത്യൻ ഓപണർ വസീം ജാഫർ ഉത്തരാഖണ്​ഡ്​ ക്രിക്കറ്റ്​ പരിശീലക പദവിയിൽനിന്ന്​ പടിയിറങ്ങിയതിനു പിന്നാലെ രാജ്യത്ത്​ ഇതുവരെയും​ കേൾക്കാത്ത ആരോപണങ്ങളുമായി അസോസിയേഷനും മറുപടിയുമായി വസീം ജാഫറും. അനർഹരെ തിരുകിക്കയറ്റാൻ ഉത്തരാഖണ്ഡ്​ ക്രിക്കറ്റ്​ അസോസിയേഷൻ സമ്മർദം ചെലുത്തുകയാണെന്ന്​​ രാജിക്കത്തിൽ വസീം ജാഫർ കുറ്റപ്പെടുത്തി. എന്നാൽ, ഡ്രസ്സിങ്​ റൂമിനെ വർഗീയവത്​കരിക്കുകയും മുസ്​ലിം താരങ്ങൾക്ക്​ മുൻഗണന നൽകുകയുമാണ്​ വസീം ജാഫറെന്ന്​ ​അസോസിയേഷൻ സെക്രട്ടറി മാഹിം വർമ പറഞ്ഞു.

വിവാദം കൊഴുത്തതോടെ ഓൺലൈൻ വാർത്താസമ്മേളനത്തിൽ, ഇത്തരം വിഷയങ്ങളിൽ മറുപടി നൽകേണ്ടിവന്നത്​ ദുഃഖകരമായ അനുഭവമായെന്ന്​ വസീം പ്രതികരിച്ചു. ''ഒരാൾക്ക്​ വന്നുപെടാവുന്ന ഏറ്റവും മോശം അവസ്​ഥയാണിത്​. ഞാൻ വർഗീയവാദിയാണെന്നു വരുത്തി വിഷയത്തിൽ വർഗീയത കലർത്തുന്നത്​ ദുഃഖകരമാണ്​''- രഞ്​ജിയിൽ ചരിത്രത്തിലെ ഏറ്റവും ഉയർന്ന റൺവേട്ടക്കാരനായ മുംബൈ താരം പറഞ്ഞു.

എന്നാൽ, പരിശീലനത്തിനിടെ മൗലവിയെ വിളിച്ചുവരുത്തിയും ഹനുമാൻ ഭക്​തിഗാനം ഉരുവിടുന്നത്​ മാറ്റിയും വർഗീയവത്​കരിക്കുകയായിരുന്നുവെന്ന്​ വർമ വിമർശിക്കുന്നു. ''രാംഭക്​ത്​ ഹനുമാൻ കി ജയ്​ ചൊല്ലി കളിക്കാനിറങ്ങണമെന്നാണ്​ താരങ്ങളുടെ ആഗ്രഹം. അത്​ മാറ്റണമെന്ന്​ വസീം ജാഫറും. ഡെറാഡൂണിൽ പരിശീലനത്തിനിടെ ഒരു മൗലവി മൈതാനത്തു വന്ന്​ രണ്ടു തവണ നമസ്​കരിച്ചു. ബയോ ബബ്​ൾ നിലനിൽക്കെ എങ്ങനെയാണ്​ ഒരു മൗലവിക്ക്​ മൈതാനത്തിറങ്ങാനാകുക. ഇത്​ നേരത്തെ അറിയിക്കേണ്ടിയിരുന്നുവെന്ന്​ ഞാൻ താരങ്ങളോട്​ പറഞ്ഞു''- വർമയുടെ വാക്കുകൾ.

ഇതിന്​ വസീം ജാഫറുടെ മറുപടി ഇങ്ങനെ: ''ഞാൻ വിളിച്ചല്ല മൗലവി വന്നത്​. ഇഖ്​ബാൽ അബ്​ദുല്ലയാണ്​ വിളിച്ചത്​. വെള്ളിയാഴ്​ച നമസ്​കാരത്തിന്​ ഒരു മൗലവി വേണ്ടിയിരുന്നു. ഇഖ്​ബാൽ അതിന്​ അനുമതി തേടി. ഞാൻ നൽകുകയും ചെയ്​തു. ഡ്രസ്സിങ്​ റൂമിനകത്താണ്​ ഞങ്ങൾ നമസ്​കരിച്ചത്​. രണ്ടുതവ​ണയോ മൂന്നു തവണയോ മാത്രമാണ്​ അതു സംഭവിച്ചത്​. അതും ബയോ- ബബ്​ൾ നിലവിൽ വരുംമുമ്പ്​''.

'' താരങ്ങൾ 'ജയ്​ ഹനുമാൻ ജയ്​' ചൊല്ലരുതെന്ന്​ ഞാൻ പറഞ്ഞതായി പറയുന്നു. ആദ്യം പറയാനുള്ളത്​ ഒരു താരവും ഒരു ​​​േശ്ലാകവും പതിവായി ചൊല്ലിയിരുന്നില്ല. സിഖുകാരായ ചില താരങ്ങളുണ്ട്​. അവർ 'റാണി മാത സച്ചേ ദർബാർ കി ജയ്​' ചൊല്ലും​. എല്ലാവരും ചേർന്ന്​ 'ഗോ ഉത്തരാഖണ്ഡ്​' എന്നോ 'കമോൺ ഉത്തരാഖണഡ്​' എന്നോ മറ്റോ ചൊല്ലാമെന്ന്​ പറഞ്ഞിരുന്നു. ഞാൻ വിദർഭക്കൊപ്പമായിരുന്നപ്പോൾ 'കമോൺ വിദർഭ' എന്നാണ്​ ടീം പാടിയിരുന്നത്​. അതും ഞാനല്ല, താരങ്ങളാണ്​ നിർദേശിച്ചത്​''- വസീം ജാഫർ പറഞ്ഞു.

''അതിൽ വർഗീയത വേണമായിരുന്നുവെങ്കിൽ 'അല്ലാഹു അക്​ബർ'' എന്നല്ലേ ഞാൻ ചെ​ാല്ലേണ്ടിയിരുന്നത്​. ഉച്ചക്കു നമസ്​കരിക്കാൻ പരിശീലനം രാവിലെ നേരത്തെ ആക്കുകയും ചെയ്യേണ്ടിയിരുന്നില്ലേ''.

കഴിഞ്ഞ വർഷമാണ്​ വസീം ജാഫർ ഉത്തരാഖണ്ഡ്​ പരിശീലക പദവി ഏറ്റെടുക്കുന്നത്​. അതിനു ശേഷം ജയ്​ ബിസ്​ത, ഇഖ്​ബാൽ അബ്​ദുല്ല, സമദ്​ ഫലാഹ്​ എന്നീ താരങ്ങളെ ടീമിലെത്തിച്ചിരുന്നു. മുൻ മുംബൈ താരം ഇഖ്​ബാൽ അബ്​ദുല്ലയാണ്​ സയിദ്​ മുഷ്​താഖ്​ ടൂർണമെൻറിൽ ടീമിനെ നയിച്ചത്​.

''സെലക്​ഷൻ കമ്മിറ്റിയെ പോലും ജാഫർ മുഖവിലക്കെടുത്തിരുന്നില്ലെന്നും' വർമ കുറ്റ​പ്പെടുത്തിയിരുന്നു.

20,000 ഫസ്​റ്റ്​ ക്ലാസ്​ റൺസിനടുത്ത്​ സ്വന്തം പേരിൽ കുറിച്ച ജാഫർ കഴിഞ്ഞ ദിവസമാണ്​ പരിശീലക പദവിയിൽ നിന്ന്​ രാജിവെച്ചത്​. 2008 വരെ ഇന്ത്യൻ ടീമിനൊപ്പമുണ്ടായിരുന്ന താരം ബംഗ്ലദേശ്​, കിങ്​സ്​ ഇലവൻ പഞ്ചാബ്​ ടീമുകളുടെ ബാറ്റിങ്​ പരിശീലകനായിരുന്നു.