മധുര അടച്ചിട്ടു; കോവിഡ്​ രോഗികളുടെ എണ്ണത്തിൽ തമിഴ്​നാട്​ രണ്ടാമത്​

ചെന്നൈ: കോവിഡ്​ രൂക്ഷമായ തമിഴ്​നാട്ടിലെ വിവിധ പ്രദേശങ്ങളിൽ സമ്പൂർണ ലോക്​ഡൗൺ. രോഗികളുടെ എണ്ണം ഉയരുന്ന സാഹചര്യത്തിൽ മധുര 30 വരെ അടച്ചിട്ടു. മധുര കോർപറേഷൻ, പരവായ്​ ടൗൺ പഞ്ചായത്ത്​, മധുര ഈസ്​റ്റ്​, മധുര വെസ്​റ്റ്​, തിരുപാരൻ കേന്ദ്രം എന്നിവിടങ്ങളിലാണ്​ സമ്പൂർണ ലോക്​ഡൗൺ.

നേരത്തേ, ചെന്നൈ, കാഞ്ചീപുരം, ചെങ്കൽപ്പേട്ട്​, തിരുവള്ളൂർ എന്നീ ജില്ലകൾ അടച്ചിട്ടിരുന്നു. ലോക്​ഡൗൺ ​പ്രഖ്യാപിച്ച സ്​ഥലങ്ങളിൽ അവശ്യ സേവനങ്ങൾക്കുമാത്രമാണ്​ അനുമതി. ആശുപത്രികൾ, മെഡിക്കൽ ലാബുകൾ തുടങ്ങിയ ആരോഗ്യ മേഖലയിലെ സേവനങ്ങൾ മുഴുവൻ സമയവും ലഭ്യമാകും.

മഹാരാഷ്​ട്രക്ക്​ പുറമെ ഏറ്റവും കൂടുതൽ കോവിഡ്​ ബാധിതരുള്ള സംസ്​ഥാനം തമിഴ്​നാടാണ്​. ഇതോടെ കോവിഡ്​ ബാധിതരുടെ എണ്ണത്തിൽ മൂന്നാം സ്​ഥാനത്തായി ഡൽഹി.

തമിഴ്​നാട്ടിൽ തിങ്കളാഴ്​ച 2710 പേർക്കാണ്​ പുതുതായി കോവിഡ്​ സ്​ഥിരീകരിച്ചത്​. ഇതോടെ രോഗികളുടെ എണ്ണം 62,087 ആയി. ചെ​െന്നെയിൽ മാത്രം 1487 പേർക്കാണ്​ കഴിഞ്ഞദിവസം രോഗം സ്​ഥിരീകരിച്ചത്​. തിങ്കളാഴ്​ച 37 മരണം കൂടി റിപ്പോർട്ട്​ ചെയ്​തതോടെ സംസ്​ഥാനത്ത്​ മരിച്ചവരുടെ എണ്ണം 794 ആയി.