സംസ്​കൃത പഠനം നിർബന്ധമാക്കണമെന്ന്​ ആർ.എസ്​.എസ്​ അനുകൂല സംഘടന

ന്യൂഡൽഹി: പന്ത്രണ്ടാം ക്ലാസ്​ വരെ സംസ്​കൃത പഠനം നിർബന്ധമാക്കണമെന്ന ശിപാർശയുമായി ആർ.എസ്​.എസ്​ അനുകൂല സംഘടന. ഭാരതീയ ശിക്ഷൻ മണ്ഡൽ എന്ന സംഘടനയാണ്​ സംസ്​കൃതം പഠനം നിർബന്ധമാക്കണമെന്ന്​ ആവശ്യവുമായി രംഗത്തെത്തിയത്​. നവ വിദ്യാഭ്യാസ നയരൂപകരണവുമായി ബന്ധപ്പെട്ട കെ.സ്​തൂരിരംഗൻ അധ്യക്ഷനായ കമ്മിറ്റിക്ക്​ മുമ്പാകെയാണ്​ ഇവർ ശിപാർശകൾ സമർപ്പിച്ചിരിക്കുന്നത്​. 

നിലവിലെ പാഠ്യപദ്ധതിയനുസരിച്ച്​ എട്ടാം ക്ലാസ്​ വരെ ത്രിഭാഷ സംവിധാനമാണ്​ നിലവിലുള്ളത്​. ഹിന്ദിയും ഇംഗ്ലീഷിനും പുറമേ മറ്റൊരു ഭാഷ കൂടി പഠിക്കാൻ അവസരം നൽകുന്നതാണ്​ ത്രീഭാഷ സംവിധാനം. ഒമ്പതാം ക്ലാസ്​ മുതൽ ഇംഗ്ലീഷ്​ നിർബന്ധിത വിഷയമാണ്​. ഇതിനൊപ്പം ഹിന്ദിയോ മറ്റേതെങ്കിലും ഭാഷയോ പഠിച്ചാൽ മതിയാകും. ഇൗ രീതി മാറ്റി പന്ത്രണ്ടാം ക്ലാസ്​ വരെ സംസ്​കൃതം നിർബന്ധമാക്കണമെന്നാണ്​ സംഘടനയുടെ ആവശ്യം. 

നല്ല സാമൂഹിക ജീവിതത്തിന്​ ക്ലാസിക്കൽ ഭാഷകളിലെ അറിവ്​ വിദ്യാർഥികളെ സഹായിക്കും. സംസ്​കൃത പോലുള്ള ക്ലാസിക്​ ഭാഷകൾ പഠിപ്പിക്കുന്നത്​ ഇതിന്​ സഹായകമാവുമെന്നും സംഘടന വ്യക്​തമാക്കുന്നത്​.