രാമക്ഷേത്ര ഭൂമി അഴിമതി: കോടതിയുടെ നിരീക്ഷണത്തിൽ അന്വേഷണത്തിന്​ ഉത്തരവിടണം –കോൺഗ്രസ്​

ന്യൂഡൽഹി: ബാബരി മസ്​ജിദ്​ നിലനിന്ന സ്​ഥലത്ത്​ രാമക്ഷേത്ര നിർമാണത്തിനായി ഭൂമി വാങ്ങിയതിൽ രാമക്ഷേത്ര ട്രസ്​റ്റ്​ നടത്തിയ കോടികളുടെ അഴിമതിയിൽ പരമോന്നത കോടതിയും പ്രധാനമന്ത്രി നരേന്ദ്ര മോദിയും ഉത്തരവാദിത്തം നിറവേറ്റണമെന്ന്​ കോൺഗ്രസ്​ വക്താവ്​ രൺദീപ്​ സുർജേവാല. കോടതിയുടെ നിരീക്ഷണത്തിൽ അന്വേഷണത്തിന്​ ഉത്തരവിടണമെന്നും അദ്ദേഹം ആവശ്യപ്പെട്ടു.

രാമ​‍െൻറ പേരിൽ ബി.ജെ.പി നേതാക്കൾ നിരന്തരം കൊള്ള നടത്തുകയാണ്​. വിഷയത്തിൽ സുപ്രീംകോടതിയുടെയും പ്രധാനമന്ത്രിയുടെയും മൗനം ചോദ്യംചെയ്യപ്പെടേണ്ടതുണ്ടെന്നും സുർജേവാല വ്യക്തമാക്കി. സുപ്രീംകോടതി വിധി പ്രകാരമാണ്​ ക്ഷേത്രം പണിയുന്നത്​. ആ നിലക്ക്​ ക്ഷേത്രനിർമാണ ട്രസ്​റ്റിന്​ വരുന്ന വരുമാനം കോടതി നിരീക്ഷണത്തിൽ ഒാഡിറ്റ്​ ചെയ്യുകയും കുറ്റക്കാരെ ശിക്ഷിക്കുകയും വേണം.

സുപ്രീംകോടതിയും പ്രധാനമന്ത്രിയും കടമ നിറവേറ്റുമോ എന്നാണ്​ ഇനി അറിയേണ്ടത്​. പ്രധാനമന്ത്രി മോദിയുടെ മേൽനോട്ടത്തിലാണ്​ ക്ഷേത്രനിർമാണ ട്രസ്​റ്റ്​ രൂപവത്​കരിച്ചിട്ടുള്ളത്​.