സ്പീക്കർക്കെതിരെ അവി​ശ്വാസപ്രമേയം പരിഗണനയിൽ

ന്യൂഡൽഹി: രാഹുൽ ഗാന്ധിയുടെ എം.പി സ്ഥാനത്തിന്​ ധിറുതിപിടിച്ചും പക്ഷപാതപരമായും അയോഗ്യത കൽപിച്ചതിന്​ ലോക്സഭ സ്പീക്കർ ഓം ബിർലക്കെതിരെ അവിശ്വാസ പ്രമേയം കൊണ്ടുവരാൻ ഒരുങ്ങി കോൺഗ്രസ്​. ഇക്കാര്യത്തിൽ മറ്റു പ്രതിപക്ഷ പാർട്ടികളുമായി ചർച്ച നടക്കുകയാണ്​.

കോൺഗ്രസ്​ എം.പിമാരുടെ യോഗത്തിലാണ് അവിശ്വാസ പ്രമേയ നിർദേശം ഉണ്ടായത്​. തിങ്കളാഴ്​ച പ്രമേയം കൊണ്ടുവരാനാണ്​ കോൺഗ്രസ്​ ആലോചിക്കുന്നത്​. എന്നാൽ, ചില പാർട്ടികൾക്ക്​ യോജിപ്പില്ല. പ്രതിപക്ഷ ഐക്യത്തിൽ ഈയിടെയുണ്ടായ ഉണർവിന്​ ഭിന്നാഭിപ്രായങ്ങൾ ദോഷം ചെയ്യുമെന്നാണ്​ അവരുടെ കാഴ്ചപ്പാട്​.

50 എം.പിമാരുടെ കൈയൊപ്പുണ്ടെങ്കിൽ സ്പീക്കർക്കെതിരെ അവിശ്വാസ പ്രമേയം ​കൊണ്ടുവരാം. എന്നാൽ, പാർലമെന്‍റ്​ നടപടികൾ തുടർച്ചയായി സ്തംഭിക്കുന്നതാണ്​ നിലവിലെ സാഹചര്യം. ബഹളാന്തരീക്ഷത്തിൽ അവിശ്വാസ പ്രമേയം ചർച്ചക്കെടുക്കാൻ കഴിയില്ലെന്ന പ്രശ്നവുമുണ്ട്​. അപകീർത്തി കേസിൽ സൂറത്ത്​ കോടതി രാഹുലിനെതിരെ ശിക്ഷാവിധി പുറപ്പെടുവിച്ച്​ മണിക്കൂറുകൾക്കകം എം.പി സ്ഥാനത്തിന്​ അയോഗ്യത കൽപിക്കുകയാണ്​ ലോക്​സഭ സെക്രട്ടേറിയറ്റ്​ ചെയ്തത്​.