ഗുജറാത്തിൽ തൊഴിൽരഹിതർക്ക്​ 5000 രൂപവീതം നൽകുമെന്ന്​ കോൺഗ്രസ്​

അഹമ്മദാബാദ്​: ഗുജറാത്തിൽ അധികാരത്തിലെത്തിയാൽ തൊഴിൽരഹിതർക്ക് യോഗ്യതക്കനുസരിച്ച്​ ​ 5000 രൂപ വീതം നൽകുമെന്ന്​ കോൺഗ്രസ്​. ഇക്കണോമിക്​സ്​ ടൈംസിന്​ നൽകിയ അഭിമുഖത്തിൽ ഗുജറാത്തി​​െൻറ ചുമതലയുള്ള എ.​െഎ.സി.സി ജനറൽ സെക്രട്ടറി അശോക്​ ഗെഹ്​ലോട്ടാണ്​ ഇക്കാര്യം പറഞ്ഞത്​. 

അധികാരത്തിലെത്തിയാൽ പാവപ്പെട്ടവർക്ക്​ വീട്​ നിർമിച്ച്​ നൽകും. മുന്നാക്ക വിഭാഗങ്ങളിലെ സാമ്പത്തികമായി പിന്നാക്കം നിൽക്കുന്നവർക്ക്​ തൊഴിൽ സംവരണം ഏർപ്പെടുത്തും. അൽപേഷ്​ താക്കൂർ കോൺഗ്രസിൽ ചേരാമെന്ന്​ സമ്മതിച്ചിട്ടുണ്ട്​. ഹർദിക്​ പ​േട്ടലുമായും, ജിഗ്​നേഷ്​ മേവാനിയുമായും ചർച്ചകൾ തുടരുകയാണെന്ന്​ അദ്ദേഹം പറഞ്ഞു.

കർഷകരുടെ അവസ്ഥ ഗുജറാത്തിൽ പരിതാപകരമാണ്​. കർഷകരുടെ സ്ഥിതി മെച്ചപ്പെടുത്തുന്നതിനായി കോൺഗ്രസ്​ നടപടികൾ സ്വീകരിക്കും. കർഷകർക്ക്​ വിളകൾക്ക്​ ന്യായവില ഉറപ്പാക്കും. ജി.എസ്​.ടി ഗുജറാത്ത്​ വ്യവസായ മേഖലയിൽ പ്രതികൂലമായാണ്​ ബാധിച്ചിരിക്കുന്നത്​. വ്യവസായ മേഖലയുടെ പുരോഗതിക്കായും നടപടികൾ സ്വീകരിക്കുമെന്നും അദ്ദേഹം വ്യക്​തമാക്കി.