കർണാടക നഗര തദ്ദേശ തെരഞ്ഞെടുപ്പിൽ കോൺഗ്രസിന്​ മികച്ച ജയം

ബംഗളൂരു: കർണാടകയിലെ നഗര തദ്ദേശ-മുനിസിപ്പൽ കൗൺസിൽ തെരഞ്ഞെടുപ്പിൽ ബി.ജെ.പിയെ മറികടന്ന്​ കോൺഗ്രസിന്​ മികച്ച നേട്ടം.58 നഗര തദ്ദേശ ഭരണസ്ഥാപനങ്ങളിലെ 1184 സീറ്റുകളിൽ നടന്ന​ തെരഞ്ഞെടുപ്പിൽ കോൺഗ്രസ്​ 498ഉം ബി.ജെ.പി 437ഉം ജെ.ഡി-എസ്​ 45ഉം സീറ്റ്​ നേടി. മറ്റു പാർട്ടികളും സ്വതന്ത്രരുമായി 204 സീറ്റ്​ പങ്കിട്ടു. സംസ്ഥാനത്തെ ഭരണകക്ഷിയായ ബി.ജെ.പിക്ക്​ തെരഞ്ഞെടുപ്പ്​ തിരിച്ചടിയായി. 2023ൽ നടക്കാനിരിക്കുന്ന നിയമസഭ തെരഞ്ഞെടുപ്പിനു​ മുന്നോടിയായി കോൺഗ്രസി‍െൻറ ശക്തിപ്രകടനം കൂടിയായി ഫലം​.

അഞ്ച്​ സിറ്റി മുനിസിപ്പൽ കൗൺസിലായി 166 വാർഡുകളിലും 19 ടൗൺ മുനിസിപ്പൽ കൗൺസിലിലായി 441 വാർഡുകളിലും 34 പട്ടണ പഞ്ചായത്തുകളിലായി 577 വാർഡുകളിലുമാണ്​ തെരഞ്ഞെടുപ്പ്​ നടന്നത്​. സിറ്റി മുനിസിപ്പൽ കൗൺസിലിൽ ബി.ജെ.പി 67ഉം കോൺഗ്രസ്​ 61ഉം ജെ.ഡി-എസ്​ 12ഉം മറ്റുള്ളവർ 26ഉം സീറ്റ്​ നേടി. ടൗൺ മുനിസിപ്പൽ കൗൺസിലിൽ കോൺഗ്രസ്​ 201ഉം ബി.ജെ.പി 176ഉം ജെ.ഡി-എസ്​ 21ഉം മറ്റുള്ളവർ 43ഉം സീറ്റിൽ ജയിച്ചു. പട്ടണ പഞ്ചായത്തിൽ കോൺഗ്രസ്​ 236ഉം ബി.ജെ.പി 194ഉം ജെ.ഡി-എസ്​ 12ഉം മറ്റുള്ളവർ 135ഉം സീറ്റിൽ വിജയികളായി. 42.06 ശതമാനം വോട്ട്​​ കോൺഗ്രസിന്​ ലഭിച്ചപ്പോൾ ബി.ജെ.പി 36.90 ശതമാനത്തിലൊതുങ്ങി. ജെ.ഡി-എസിന്​ 3.80 ശതമാനവും മറ്റുള്ളവർക്ക്​ 17.22 ശതമാനവും വോട്ട്​ ലഭിച്ചു.

മികച്ച വിജയം നേടിയ കർണാടക കോൺഗ്രസിനെ രാഹുൽ ഗാന്ധി അഭിനന്ദിച്ചു. സർക്കാറിനെ കുറിച്ച ജനങ്ങളുടെ പ്രതീക്ഷയില്ലായ്​മയുടെ പ്രതിഫലനമാണ്​ നഗര തദ്ദേശ തെരഞ്ഞെടുപ്പിൽ കണ്ടതെന്ന്​ പ്രതിപക്ഷ നേതാവ്​ സിദ്ധരാമയ്യ പ്രതികരിച്ചു. കർണാടകയിൽ കോൺഗ്രസ്​ തരംഗമാണുള്ളതെന്ന്​ ഈ ഫലം തെളിയിക്കുന്നതായി അദ്ദേഹം ചൂണ്ടിക്കാട്ടി. പണത്തി‍െൻറ അധികാരത്തിലല്ലാതെ ജനങ്ങളുടെ വോട്ടുനേടി ഭരണത്തിലെത്താൻ ബി.ജെ.പിക്ക്​ കഴിയില്ലെന്നും അദ്ദേഹം പറഞ്ഞു.

ഫലം ഭിന്നിപ്പി‍െൻറ രാഷ്ട്രീയത്തി‍െൻറ പ്രതിഫലനം- സുർജെവാല

ബംഗളൂരു: കർണാടകയിലെ നഗര തദ്ദേശ തെരഞ്ഞെടുപ്പിലെ ഫലം ബി.ജെ.പിയുടെ ഭിന്നിപ്പിക്കൽ രാഷ്ട്രീയത്തിനുള്ള മറുപടിയാണെന്ന്​ എ.ഐ.സി.സി ജനറൽ സെക്രട്ടറി രൺദീപ്​ സിങ്​ സുർജെവാല. മതപരിവർത്തന നിരോധന ബിൽ അടക്കമുള്ള സർക്കാറി‍െൻറ നടപടികളെ പുരോഗമനവാദികളായ കർണാടകക്കാർ തള്ളിയിരിക്കുന്നു. ഭിന്നിപ്പി‍െൻറ രാഷ്​ട്രീയം ജനംതിരിച്ചറിഞ്ഞിരിക്കുന്നു. അഴിമതിക്കാരായ ബൊമ്മൈ സർക്കാർ അധികാരത്തിൽ തുടരുന്ന ഓരോ നിമിഷത്തിലും വികസനവും പുരോഗതിയും പുറന്തള്ളപ്പെടുകയാണ്​. കോൺഗ്രസിന്​ മഹത്തായ ജയം സമ്മാനിച്ച കന്നടിഗർക്ക്​ നന്ദി അറിയിക്കുന്നതായും സുർജെ വാല പറഞ്ഞു.