ഇന്ത്യയി​ലേക്ക്​ മടങ്ങി വരുന്നില്ലെന്ന്​ സാകിർ നായിക്​

ന്യൂ‍ഡൽഹി: ഇന്ത്യയിലേക്ക്​ തിരിച്ചെത്തുമെന്ന വാർത്ത നിഷേധിച്ച്​ മതപ്രഭാഷകന്‍ സാകിര്‍ നായിക്​. മലേഷ്യയിൽ നിന്ന്​ ഇന്ന് ഇന്ത്യയിലേക്കു തിരിക്കുമെന്ന വാർത്ത അടിസ്ഥാന രഹിതമാണെന്ന്​ സാകിര്‍ നായിക്​ പ്രതികരിച്ചു. ‘‘ഇന്ത്യയിലേക്ക്​ തിരിച്ചു വരാൻ തീരുമാനിച്ചിട്ടില്ല. ഇന്ത്യയിൽ നടക്കാൻ പോകുന്ന അന്യായ വിചാരണയിൽ വിശ്വാസമില്ല. എപ്പോഴാണോ  സർക്കാർ തനിക്ക്​ നീതിയും ന്യായവും ഉറപ്പുവരുത്തുന്നത്​, ആ സമയം സ്വന്തം രാജ്യത്തേക്ക്​ മടങ്ങി​യെത്തും’’ - നായിക്​ വ്യക്തമാക്കി.

സാകിർ നായിക്കിന്​ ഒരു തരത്തിലുള്ള നാടുകടത്തൽ നോട്ടീസും ലഭിച്ചിട്ടില്ലെന്ന്​ അദ്ദേഹത്തി​​െൻറ അഭിഭാഷകൻ ഷഹറുദ്ദീൻ അലി വ്യക്തമാക്കി. 

സാകിർ നായിക്​ ഇന്ന്​ രാത്രി ഇന്ത്യയിലേക്ക്​ തിരിക്കുമെന്ന്​ മുതിര്‍ന്ന മലേഷ്യന്‍ പൊലീസ് ഉദ്യോഗസ്ഥന്‍ അറിയിച്ചതായി ദേശീയ മാധ്യമങ്ങള്‍ റിപ്പോര്‍ട്ട് ചെയ്തിരുന്നു. എന്നാൽ ഇതു സംബന്ധിച്ച്​ മലേഷ്യൻ ആഭ്യന്തര മന്ത്രാലയം ഇതുവരെ പ്രതികരിച്ചിട്ടില്ല.

സാകിര്‍ നായിക് മലേഷ്യയില്‍ ഉണ്ടെന്ന വിവരങ്ങള്‍ പുറത്തു വന്നതിനു പിന്നാലെ, വിട്ടുകിട്ടാനായുള്ള നടപടികള്‍ കേന്ദ്ര വിദേശകാര്യ മന്ത്രാലയം ആരംഭിച്ചിരുന്നു. 2016 ജൂലൈയില്‍ ഇന്ത്യ വിട്ട നായിക് മലേഷ്യയിൽ അഭയം തേടുകയായിരുന്നു. 

 ഭീകരപ്രവര്‍ത്തനങ്ങള്‍ക്ക്​ പ്രേരിപ്പിച്ചത്​ സാകിർ നായികി​​െൻറ മതപ്രാഭാഷണങ്ങളാണെന്ന ധാക്ക സ്​ഫോടന കേസ്​ പ്രതികളുടെ മൊഴിയെ തുടർന്നാണ്​ അദ്ദേഹത്തിനെതിരെ കേസെടുത്തത്​. തുടർന്ന്​ ഇന്ത്യ വിട്ട നായിക്കിനെതിരെ കള്ളപ്പണ ഇടപാട് ഉള്‍പ്പെടെ ഒട്ടേറെ കേസുകള്‍ എൻ.​െഎ.എ റജിസ്റ്റര്‍ ചെയ്തിട്ടുണ്ട്.