കോവിഡ്​: ആശങ്ക ഏഴ്​ സംസ്ഥാനങ്ങളിലെ 60 ജില്ലകളിൽ -മോദി

ന്യൂഡൽഹി: രാജ്യത്ത്​ കോവിഡ്​ ഏറ്റവും കൂടുതൽ ആശങ്ക വിതക്കുന്നത്​ ഏഴ്​ സംസ്ഥാനങ്ങളിലെ 60 ജില്ലകളിലാണെന്ന്​ പ്രധാനമന്ത്രി നരേന്ദ്രമോദി. കോവിഡ്​ ബാധ ഏറ്റവും രൂക്ഷമായി തുടരുന്ന ഏഴ്​ സംസ്ഥാനങ്ങളിലെ മുഖ്യമന്ത്രിമാരുമായി നടത്തിയ വീഡിയോ കോൺഫറൻസിലാണ്​ പ്രധാനമന്ത്രിയുടെ പരാമർശം.

പരിശോധനകൾ വർധിപ്പിക്കുക, രോഗികളെ കണ്ടെത്തുക, ചികിൽസയും നിരീക്ഷണവും, ബോധവൽക്കരണം എന്നിവയാണ്​ കോവിഡിനെ പ്രതിരോധിക്കാനുള്ള പ്രധാന മാർഗങ്ങളെന്ന്​ അദ്ദേഹം പറഞ്ഞു. മുഖ്യമന്ത്രിമാർ ജില്ല, ബ്ലോക്ക്​തല ഉദ്യോഗസ്ഥരുമായി വീഡിയോ കോൺഫറൻസ്​ നടത്തണമെന്നും അദ്ദേഹം ആവശ്യപ്പെട്ടു.

മഹാരാഷ്​ട്ര, ആന്ധ്രപ്രദേശ്​, കർണാടക, ഉത്തർപ്രദേശ്​, തമിഴ്​നാട്​, പഞ്ചാബ്​, ഡൽഹി എന്നീ സംസ്ഥാനങ്ങളിലാണ്​ രാജ്യത്തെ 63 ശതമാനം ആക്​ടീവ്​ കോവിഡ്​ കേസുകളും. ഇതുവരെ സ്ഥിരീകരിച്ച കോവിഡ്​ കേസുകളിൽ 65.5 ശതമാനവും ഈ സംസ്ഥാനങ്ങളിലാണ്​. രാജ്യത്തെ 77 ശതമാനം മരണങ്ങളും ഈ ഏഴ്​ സംസ്ഥാനങ്ങളിലാണ്​ റിപ്പോർട്ട്​ ചെയ്​തത്​.