കൊറോണ പേടി: നോയിഡയിലെ രണ്ടു സ്​കൂളുകൾ അടച്ചിട്ടു

നോയിഡ: കോവിഡ്​ 19 സംശയത്തെ തുടർന്ന്​ നോയിഡയിലെ രണ്ടു സ്​കൂളുകൾ അടച്ചിട്ടു. രണ്ടു കുട്ടികളുടെ രക്തം വിദഗ്ധ പരിശോധനക്കായി അയച്ചിട്ടുണ്ട്​. ഡൽഹിയിൽ ​കൊറോണ വൈറസ്​ ബാധിച്ച വ്യക്തി സ്​കൂളിലെ കുട്ടികളോടൊപ്പം ജന്മദിനാഘോഷത്തിൽ പ​​ങ്കെടുത്തുവെന്ന്​ കണ്ടെത്തിയതിനെ തുടർന്നാണ്​ നടപടിയെന്ന്​ ഇന്ത്യ ടുഡേ റിപ്പോർട്ട്​ ചെയ്​തു.

സ്​കൂൾ അണുവിമുക്തമാക്കുന്നതിനായാണ്​ ചൊവ്വാഴ്​ച അടച്ചിട്ടത്​. സ്​കൂളിലെത്തിയ വിദ്യാർഥികളെ രക്ഷിതാക്കളെ വിളിപ്പിച്ചശേഷം വീട്ടിലേക്ക്​ പറഞ്ഞയക്കുകയായിരുന്നു. വിവരം അറിഞ്ഞതിനെ തുടർന്ന്​ സ്​കൂൾ സന്ദർശിച്ചതായി ഗൗതം ബുദ്ധ നഗർ സി.എം.ഒ ഡോ. അനുരാഗ്​ ഭാർഗവ്​ അറിയിച്ചു. കൂടാതെ കൊറോണയെ സംബന്ധിച്ച പരി​​ഭ്രാന്തി വേണ്ടെന്നും വ്യാജവാർത്തകളിൽ വീഴരുതെന്നും സി.എം.ഒ അറിയിച്ചു.

ഡൽഹിയി​ൽ കൊറോണ ബാധിച്ച വ്യക്തിയുടെ വീടിൻെറ സമീപത്തെ സ്​കൂളും​ അടച്ചിട്ടു.​ ഏതെങ്കിലും തരത്തിൽ വൈറസ്​ പടരുന്നത്​ തടയാനായാണ്​ സ്​കൂൾ അടച്ചതെന്ന്​ അധികൃതർ അറിയിച്ചു. മാർച്ച്​ ഒമ്പതുവരെ സ്​കൂൾ അണ​ുവിമുക്തമാക്കുന്നതിനായി അടച്ചിടും. ഇതുസംബന്ധിച്ച്​ രക്ഷിതാക്കൾക്ക്​ ഇമെയിൽ അയച്ചു.