ഡൽഹിയിൽ കോവിഡ്​ ബാധിതർ കുതിക്കുന്നു; കാരണം എണ്ണിപറഞ്ഞ്​ ആരോഗ്യമന്ത്രി

ന്യൂഡൽഹി: രാജ്യതലസ്​ഥാനത്ത്​ കോവിഡ്​ ബാധിതരുടെ എണ്ണം ഉയരുന്നതിൽ ആശങ്ക രേഖപ്പെടുത്തി ആരോഗ്യമ​ന്ത്രി സ​ത്യേന്ദർ ജെയിൻ. ഉത്സവ സീസണുകൾ വരുന്നതും ശൈത്യകാലവും വായു മലിനീകരണവും സംസ്​ഥാനത്ത്​ കോവിഡ്​ വീണ്ടും പകരാൻ ഇടയാക്കുന്നതായി അദ്ദേഹം പറഞ്ഞു. ഇൗയാഴ്​ചയിൽ ഡൽഹിയിൽ കോവിഡ്​ കേസുകളുടെ എണ്ണത്തിൽ വൻവർധനയുണ്ടായിരുന്നു. അതിനോട്​ പ്രതികരിക്കുകയായിരുന്നു ആരോഗ്യമ​ന്ത്രി.

കോവിഡ്​ നിരക്ക്​ ഉയരുന്നതോടെ കേന്ദ്ര സർക്കാർ തിങ്കളാഴ്​ച മുതിർന്ന ഉദ്യോഗസ്​ഥരുമായി കൂടിക്കാഴ്​ച നടത്തി സാഹചര്യം വിലയിരുത്തും. വെള്ളിയാഴ്​ച പുതുതായി 5891 പേർക്കാണ്​ കോവിഡ്​ സ്​ഥിരീകരിച്ചത്​. 47 മരണവും റിപ്പോർട്ട്​ ചെയ്​തു.

ഡൽഹിയിൽ ഒരാഴ്​ചയായ വായുമലിനീകരണ നിരക്ക്​ കുത്തനെ ഉയർന്നിരുന്നു. വായുമലിനീകരണ സൂചിക അപകട നിലയി​ലാണ്​ കഴിഞ്ഞ പത്തുദിവസമായി. അന്തരീക്ഷ മലിനീകരണം കോവിഡ്​ പടർന്നുപിടിക്കുന്നതിൽ പങ്കുവഹിക്കു​ന്നുണ്ടെന്നാണ്​ വിലയിരുത്തൽ.

ജനങ്ങൾ കോവിഡിനെതിരെ പുലർത്തിയിരുന്ന ജാഗ്രത കൈവെടിഞ്ഞതായും സത്യേന്ദർ ജെയിൻ കൂട്ടിച്ചേർത്തു. മാസ്​ക്​ ധരിക്കുന്നതിൽ പ്രധാന്യം നൽകുന്നില്ല. കോവിഡിൽനിന്ന്​ മാത്രമല്ല വായു മലിനീകരണത്തിൽനിന്നും മാസ്​ക്​ രക്ഷനൽകും -അദ്ദേഹം പറഞ്ഞു.

വെള്ളിയാഴ്​ച എല്ലാവരോടും മാസ്​ക്​ ധരിക്കണമെന്ന അഭ്യർഥനയുമായി ആരോഗ്യമന്ത്രി രംഗത്തെത്തിയിരുന്നു. 'നമ്മൾ ​ലോക്​ഡൗൺ പ്രഖാപിച്ചപ്പോൾപോലും കോവിഡ്​ നിരക്ക്​ കുറക്കാൻ സാധിച്ചിരുന്നില്ല. നൂറുശതമാനം പേരും മാസ്​ക്​ ധരിക്കാൻ തുടങ്ങി​യതോടെ കോവിഡ്​ ബാധയെ ഒരു പരിധിവരെ നിയന്ത്രിക്കാൻ കഴിഞ്ഞു. ​ലോക്​ഡൗൺ ഏർപ്പെടുത്തുന്ന​തിനേക്കാൾ ഫലപ്രദം മാസ്​ക്​ ധരിക്കുന്നതാണ്​. വാക്​സിൻ എത്തുന്നതുവരെ, മാസ്​കിനെ വാക്​സിനായി പരിഗണിക്കണം' -അദ്ദേഹം അഭ്യർഥിച്ചു.