കോവിഡ്​ വ്യാപനം; മഹാരാഷ്​ട്രയിൽ ശനിയാഴ്ച​ രാത്രി മുതൽ കർശന നിയന്ത്രണം

മുംബൈ: മഹാരാഷ്​ട്രയിൽ കോവിഡ്​ ബാധിതരുടെ എണ്ണം കുത്തനെ ഉയർന്നതോടെ കർശന നിയന്ത്രണങ്ങളുമായി സംസ്​ഥാന സർക്കാർ. രാഷ്​ട്രീയ, മത, സാംസ്​കാരികൾ പരിപാടികൾ ഉൾപ്പെടെ എല്ലാത്തരം ഒത്തുചേരലുകൾക്കും നിരോധനം ഏർപ്പെടുത്തി.

ശനിയാഴ്​ച രാത്രി മുതൽ നിയന്ത്രണങ്ങൾ ബാധകമാകും. ഏഴുവരെ റസ്റ്ററന്‍റുകൾ, മാളുകൾ, ഗാർഡനുകൾ തുടങ്ങിയവ അടച്ചിടും. ബീച്ചുകളിലും പ്രവേശനം നിയന്ത്രിക്കും. ഡ്രാമ തിയറ്ററുകൾ അടച്ചിടും.

രാത്രി ഓൺലൈൻ ഭക്ഷണവിതരണത്തിന്​ തടസമുണ്ടാകില്ല. രാത്രി എട്ടുമുതൽ രാവിലെ ഏഴുവരെ അഞ്ചിൽ കൂടുതൽ പേരുടെ ആൾക്കൂട്ടം അനുവദിക്കില്ല.

നിയന്ത്രണങ്ങൾ ലംഘിക്കുന്നവരിൽനിന്ന്​ 1000 രൂപ പിഴ ഈടാക്കാനും സർക്കാർ തീരുമാനിച്ചു. മാസ്​ക്​ ധരിച്ചില്ലെങ്കിൽ പിഴ 500 രൂപയായിരിക്കും. പൊതു സ്​ഥലത്ത്​ തുപ്പിയാൽ​ 1000 രൂപ പിഴ ഈടാക്കുമെന്നും ഉത്തരവിൽ പറയുന്നു.