കോവിഡ്​ വാർഡിൽ സന്ദർശകരുടെ തിരക്ക്​; തോക്കേന്തിയ കാവൽക്കാരുമായി​ ഡോക്​ടർ

ഭാഗൽപൂർ: ''കോവിഡ്​ വാർഡിൽ സന്ദർശകരുടെ തിരക്കാണ്​. രോഗികള​ുടെ സുഖവിവരം അറിയാനും വീട്ടിലുണ്ടാക്കിയ ഭക്ഷണം നൽകാനും മസാജ്​ ചെയ്​തുകൊടുക്കാൻ പോലും അടുത്ത ബന്ധുക്കൾ ആശുപത്രി അധികൃതരുടെ കണ്ണുവെട്ടിച്ച്​ അകത്തുകയറും. പലരും മാസ്​ക്​ പോലും ധരിക്കാറില്ല. ഡോക്​ടർമാർ വഴക്കു പറഞ്ഞാലും ഒരു വാതിലിലൂടെ ഇറങ്ങി മറ്റൊന്നിലൂടെ അകത്തുകയറുന്നവർ. ഐ.സി.യുവിൽ പോലും കയറിയിറങ്ങുന്നു''. ബിഹാറിലെ ഭാഗൽപൂരിൽ ഗംഗാനദിയുടെ തീരത്തുള്ള ആശുപത്രിയിലെ ദുരവസ്ഥയാണ്​ ഡോ. കുമാർ ഗൗരവ് വിവരിച്ചത്​. ജീവനക്കാർ എത്ര​ശ്രമിച്ചിട്ടും അവസ്ഥയിൽ മാറ്റമില്ലാതായതോടെ സുരക്ഷക്കായി തേക്കേന്തിയ രണ്ട്​ കാവർക്കാരെ ഏർപ്പെടുത്തുകയാണ്​ കോവിഡ്​ ഡ്യൂട്ടിയിലുള്ള ഡോ. കുമാർ ഗൗരവ്​ ചെയ്​തത്​. രോഗികളുടെ വിവരം അന്വേഷിച്ചെത്തുന്നവരെ തടയാനാണ്​ കാവൽക്കാർ.

കോവിഡ്​ ആശുപത്രിയിൽ നിന്നും വൈറസ്​ പുറത്തേക്ക്​ പടരാതിരിക്കാൻ പടരുന്നത്​ തടയാൻ ജീവനക്കാർ ശ്രമിക്കുന്നുവെങ്കിലും നിയന്ത്രിക്കാൻ കഴിയാത്ത അവസ്ഥയാണെന്ന്​ ഡോക്​ടർ വിശദീകരിക്കുന്നു. സഹപ്രവറത്തകർ ഏറ്റെടുക്കാൻ വിസമ്മതിച്ച ദൗത്യമാണ്​ ജവഹൽലാൽ നെഹ്​റു മെഡിക്കൽ കോളജ്​ ആശുപത്രിയിലെ അധ്യാപകനും കൺസൾറ്റൻറ്​ സൈക്യാട്രിസ്​റ്റുമായ ഡോ. കുമാർ ഗൗരവ്​ ഏറ്റെടുത്തിട്ടുള്ളത്​. .

"അകത്തുകയറുന്നത്​ തടഞ്ഞാൽ അവർക്ക് ദേഷ്യം വരുന്നു, രോഗികൾക്ക് വീട്ടിൽ ഉണ്ടാക്കിയ ഭക്ഷണം നൽകാൻ കൊണ്ടുവരുന്നു. ജീവനക്കാരുടെ കണ്ണ്​ തെറ്റിയാൽ അടുത്തിരുന്ന്​ ഭക്ഷണം നൽകുകയും മസാജ്​ ചെയ്​ത്​ കൊടുക്കുകയും ചെയ്യുന്നു. മാത്രമല്ല അവർ നമ്മുടെ ഐ.സി.യു.കളിൽ പോലും കയറി വൈറസ്​ബാധ സമൂഹത്തിലെ മറ്റ് ആളുകളിലേക്ക് കൂടി എത്തിക്കുന്നു.

ഇത് മൺസൂൺ കാലമാണ്. സന്ദർശകർക്കൊപ്പം ഈർപ്പം അസഹനീയമായ അളവിൽ എത്ത​ുന്നുണ്ട്​. ആശുപത്രിയിൽ എയർകണ്ടീഷണറുകൾ പ്രവർത്തിക്കുന്നില്ല. ചിലരുടെ ബന്ധുക്കൾ ഹാൻഡ്​ ഫാനുകളും മറ്റുകൊണ്ടുവന്ന്​ പ്രവർത്തിപ്പിക്കുന്നതും അണുബാധ വർധിപ്പിക്കുന്നു. നിരവധി നഴ്​സിങ്​ ജീവനക്കാർക്ക​ും ഡോക്​ടർമാർക്കും കോവിഡ്​ ബാധയുണ്ടായി. ഇവിടെ വിദഗ്​ധ ചികിത്സ ലഭിക്കണമെങ്കിൽ 200 കിലോമീറ്ററെങ്കിലും യാത്ര ചെയ്യണം- ബിഹാറിലെ ഗ്രാമപ്രദേശങ്ങളിലെ മോശം അടിസ്ഥാനസൗകര്യങ്ങളാണ്​ സംസ്ഥാനത്തെ കോവിഡ്​ വ്യാപനത്തിനും മരണത്തിനും കാരണമാകുന്നതെന്നും ഡോ.കുമാർ പറയുന്നു.

ജൂണിൽ കോവിഡ്​ അതിവ്യാപനമുണ്ടായപ്പോൾ രോഗലക്ഷണങ്ങളില്ലാത്ത കോവിഡ്​ രോഗികൾക്കും ചികിത്സ നൽകണമെന്ന്​ ജില്ലാ ഭരണകൂടം അറിയിച്ചിരുന്നു. എന്നാൽ അതിനുതകുന്ന ഒരു സൗകര്യവുമില്ലെന്ന്​ അദ്ദേഹം ചുണ്ടിക്കാട്ടുന്നു. ഭഗൽപൂരിലെ ആരോഗ്യസംരക്ഷണ സംവിധാനവും ബീഹാറിലെ മറ്റു പല ഭാഗങ്ങളിലേതുപോലെ തകർച്ചയുടെ വക്കിലാണെന്നും അദ്ദേഹം ചൂണ്ടിക്കാട്ടുന്നു.

ഐ.സി.യുവിലെ 37 കിടക്കകളിലും രോഗികളുണ്ട്​. അവിടെയും ബന്ധുക്കൾ കയറി തറയിൽ പുതപ്പും വിരിച്ച്​ രോഗിയെ പരിചരിക്കാനിരിക്കുന്നു. കോവിഡ് രോഗികളെ സമ്പർക്കമില്ലാതെ ചികിത്സിക്കുക എന്നത്​ വെല്ലുവിളിയാവുകയാണ്​. അതിലെ വീഴ്ച തടയാൻ തനിക്ക് കഴിയുന്നില്ലെന്ന്​ ഡോ.കുമാർ പറയുന്നു.

''ആരാണ് കോവിഡ്​ പോസിറ്റീവ്, ആരാണ് നെഗറ്റീവെന്ന്​ ഞങ്ങൾക്ക് അറിയില്ല. അവരുടെ എല്ലാം പരിശോധന ഫലം വരുന്നതുവരെ ഞങ്ങൾക്ക് കാത്തിരിക്കാനാവില്ല. അവർക്കെല്ലാം ചികിത്സ ആവശ്യമാണ്. ഏറ്റവും ദുർബലരായ ജനങ്ങളാണിവിടെയുള്ളത്'' -ഡോക്​ടർ വിശദീകരിക്കുന്നു.

നിരവധി മാസങ്ങളായി ജില്ലയിലെ കേസുകൾ ഉയർന്നു കൊണ്ടേയിരിക്കയാണ്​. ബിഹാറിൽ ഇതുവരെ 87,000 ത്തിലധികം കോവിഡ്​ കേസുകളും 465 മരണങ്ങളും സ്ഥിരീകരിച്ചിട്ടുണ്ട്.