രാജ്യത്ത്​ കോവിഡ്​ പിടിവിടുന്നു; അടുത്ത നാലാഴ്ച അതിനിർണായകമെന്ന്​ കേന്ദ്രം

ന്യൂഡൽഹി: ഒറ്റ ദിവസം കോവിഡ്​ കേസുകളുടെ എണ്ണം ലക്ഷം പിന്നിട്ടതിനു പിന്നാലെ ഏകദേശം സമാന സംഖ്യയിൽ പിറ്റേന്നും തുടർന്നതോടെ കടുത്ത സാഹചര്യത്തെ കുറിച്ച്​ മുന്നറിയിപ്പുമായി കേന്ദ്രം. വൈറസ്​ ബാധ ഏറ്റവും ശക്​തമായി തുടരുന്ന മഹാരാഷ്​ട്ര, ഛത്തീസ്​ഗഢ്​, പഞ്ചാബ്​ സംസ്​ഥാനങ്ങളിൽ 50 ഓളം ഉന്നതതല സംഘങ്ങളെ കേന്ദ്രം വിന്യസിച്ചു. മഹാരാഷ്​ട്രയിൽ 30ഉം ഛത്തീസ്​ഗഢിൽ 11ഉം പഞ്ചാബിൽ ഒമ്പതും ജില്ലകളിലേക്കാണ്​ ഇവരെ അയച്ചത്​. രാജ്യത്തെ മൊത്തം രോഗബാധയു​െട പകുതിയിലേറെയും മഹാരാഷ്​ട്രയിലാണ്​.

നടപടികളുടെ ഭാഗമായി ഡൽഹിയിൽ രാത്രികാല കർഫ്യൂ പ്രഖ്യാപിച്ചിട്ടുണ്ട്​. ഗുജറാത്ത്​ ഹൈക്കോടതി ഏപ്രിൽ 10 മുതൽ 14 വരെ അടച്ചിടും. ലോക്​ഡൗൺ നിലവിലുള്ള മുംബൈയിൽ ബീച്ചുകൾ, ഉദ്യാനങ്ങൾ എന്നിവ രാത്രി എട്ടു മുതൽ രാവിലെ ഏഴുവരെ അടച്ചിടും. ഇനി ആർ.ടി.പി.സി.ആർ പരിശോധന നടത്തിയ ശേഷം മാത്രമേ അതിർത്തി കടക്കാവൂ എന്ന്​ വിവിധ സംസ്​ഥാനങ്ങളും തീരുമാനിച്ചു.

നിയന്ത്രണങ്ങൾ ശക്​തമാക്കുന്നതിന്‍റെ ഭാഗമായി 45 വയസ്സ്​ കഴിഞ്ഞ എല്ലാ കേന്ദ്ര ജീവനക്കാരും കോവിഡ്​ വാക്​സിൻ നിർബന്ധമായി സ്വീകരിക്കണമെന്ന്​ സർക്കാർ ഉത്തരവിട്ടു.

കഴിഞ്ഞ 24 മണിക്കൂറിനിടെ രാജ്യത്ത്​ 43 ലക്ഷം ഡോസ്​ കോവിഡ്​ വാക്​സിനാണ്​ വിതരണം ചെയ്​തത്​. ഇതോടെ വാക്​സിൻ സ്വീകരിച്ചവരുടെ എണ്ണം എട്ടുകോടി കവിഞ്ഞു. വൈറസ്​ ബാധ പരിശോധന പൂർത്തിയാക്കിയത്​ 25 കോടി പേരിലുമാണ്​.