മാവോയിസ്​റ്റുകൾക്കിടയിൽ കോവിഡ്​ വ്യാപനം; 10 പേർ മരിച്ചെന്ന്​ സൂചന, കീഴടങ്ങാനാവശ്യപ്പെട്ട്​ പൊലീസ്​

ഛത്തീസ്​ഗഡ്​: മാവോയിസ്​റ്റ്​ ശക്തികേന്ദ്രങ്ങളിൽ ഉൾപ്പെടെ കോവിഡ്​ വ്യാപിച്ചതായി സൂചന. നിരവധി മാവോയിസ്​റ്റുകൾക്ക് ഇതിനകം തന്നെ കോവിഡ് ബാധിച്ച്​ മരിച്ചതായും​ അവരുടെ കേഡർമാർക്കിടയിൽ രോഗം പടർന്നിട്ടുണ്ടെന്നും ദന്തേവാഡ എസ്.പി അഭിഷേക് പല്ലവ പറഞ്ഞു. 10 പേരെങ്കിലും അണുബാധ മൂലം മരിച്ചിരിക്കാമെന്നാണ്​ നിഗമനം. 200 നക്‌സലുകൾക്ക് കൊറോണ വൈറസ് അണുബാധയുണ്ടാകാൻ സാധ്യതയുണ്ടെന്നും മുതിർന്ന പോലീസ് ഉദ്യോഗസ്ഥൻ പറഞ്ഞു. ആരോഗ്യസ്ഥിതി മോശമാകുന്ന സാഹചര്യത്തിൽ കീഴടങ്ങാൻ ആവശ്യപ്പെട്ടതായും അദ്ദേഹം കൂട്ടിച്ചേർത്തു. രോഗം ബാധിച്ചവർക്ക്​ പോലീസ് മരുന്നുകൾ നൽകുമെന്നും കീഴടങ്ങുന്നവരെ പുനരധിവസിപ്പിക്കുമെന്നും അദ്ദേഹം കൂട്ടിച്ചേർത്തു.

വനങ്ങളുടെ പ്രാന്തപ്രദേശത്ത് താമസിക്കുന്ന ഗ്രാമീണ ആദിവാസികളുമായി മാവോയിസ്​റ്റുകൾ കൂടിച്ചേരുന്നത്​ നിരപരാധികളായ ആദിവാസി ഗ്രാമീണരുടെ ജീവൻ അപകടത്തിലാക്കുമെന്നും എസ്​.പി പറഞ്ഞു.ഏതാനും ആഴ്​ചകളായി കോവിഡ് അണുബാധയെത്തുടർന്ന് സി.പി.ഐ-മാവോയിസ്റ്റ് ഗ്രൂപ്പിലെ പത്തോളം അംഗങ്ങൾ മരിച്ചതായി ബസ്​തർ പൊലീസും അവകാശപ്പെടുന്നു. തിങ്കളാഴ്​ച രാത്രി ബിജാപൂർ, സുക്​മ ജില്ലകളുടെ അതിർത്തിയിലുള്ള വനത്തിൽ സഹപ്രവർത്തകരുടെ മൃതദേഹങ്ങൾ നക്​സലുകൾ കത്തിച്ചതായി നാട്ടുകാർ അറിയിച്ചതായി പോലീസ് പറഞ്ഞു. ബിജാപൂരിലെ ഗംഗലൂർ പോലീസ് സ്റ്റേഷൻ പരിധിയിലെ പീഡിയ പ്രദേശത്ത് അഞ്ഞൂറോളം നക്​സലുകൾ ഒത്തുകൂടിയതായി ദന്തേവാഡ എസ്​.പി പറഞ്ഞു. കാലഹരണപ്പെട്ട മരുന്നുകളും കാലഹരണപ്പെട്ട ഭക്ഷ്യ ഉൽപന്നങ്ങളും വൻതോതിൽ ഭക്ഷ്യവിഷബാധയ്ക്ക് കാരണമാകുന്നതായും സൂചനയുണ്ട്​.

ഗംഗലൂർ പോലീസ് സ്റ്റേഷൻ പരിധിയിൽ പൽനാർ വനത്തിലെ മാവോയിസ്റ്റ് ക്യാമ്പിൽ നടത്തിയ റെയ്​ഡിൽ സുരക്ഷാ സേന കത്ത് ഉൾപ്പെടെയുള്ളവ പിടിച്ചെടുത്തിരുന്നു. മുതിർന്ന മാവേയിസ്​റ്റ്​ നേതാവിന്​ ക്യാമ്പിലുള്ളവർ എഴുതിയ കത്താണ്​ ഇതെന്നാണ്​ പൊലീസ്​ വാദം. കത്തിൽ സംഘടനയിലെ ഉയർന്ന അംഗങ്ങൾ ഉൾപ്പെടെ നിരവധിപേർക്ക്​ രോഗം(പേര്​ സൂചിപ്പിച്ചിട്ടില്ല) ബാധിച്ചതായി പറയുന്നുണ്ട്​. രോഗബാധയിൽ ആശങ്കയുണ്ടെന്നും വിഷയം ഗൗരവമായി കാണാനും മുതിർന്ന മാവോയിസ്റ്റ് നേതാവിനോട് കത്തിൽ അഭ്യർഥിച്ചിരുന്നു. അസുഖം കോവിഡ്​ ആണെന്ന് കത്തിൽ പറഞ്ഞിട്ടില്ലെങ്കിലും അത്തരമൊരു നിഗമനത്തിലാണ്​ മുതിർന്ന പോലീസ് ഉദ്യോഗസ്ഥർ.

'ഞങ്ങൾക്ക് ലഭിച്ച ഫീൽഡ് റിപ്പോർട്ട്​ രോഗബാധ സ്ഥിരീകരിക്കുന്നു'-ഐ‌.ജി സുന്ദർ‌രാജ് മാധ്യമങ്ങളോട്​ പറഞ്ഞു. രണ്ട് ദിവസം മുമ്പ്, ദർഭ ഡിവിഷനിലെ 100 മാവോയിസ്റ്റുകൾക്ക് കോവിഡ് ബാധിച്ചതായും അവരിൽ പലരും ഗുരുതരമായി ആസുഖ ബാധിതരാണെന്നും അഭ്യൂഹമുണ്ടായിരുന്നു.