24 മണിക്കൂറിനിടെ 19,556 പേർക്ക്​ കോവിഡ്​; ആറ്​ മാസത്തിനുശേഷം രാജ്യത്തെ ഏറ്റവും കുറഞ്ഞ നിരക്ക്​

ന്യൂഡൽഹി: കഴിഞ്ഞ 24 മണിക്കൂറിനിടെ രാജ്യത്ത്​ കോവിഡ്​ കേസുകൾ റിപ്പോർട്ട്​ ചെയ്​തത്​ 19,556 പേർക്ക്​ മാത്രം. ജൂലൈ രണ്ടിന്​ ​ശേഷമുള്ള ഏറ്റവും കുറഞ്ഞ പ്രതിദിന കോവിഡ്​ നിരക്കാണിതെന്ന്​ കേന്ദ്ര ആരോഗ്യ മന്ത്രാലയം അറിയിച്ചു. നേരത്തെ ഒരു ലക്ഷത്തിന്​ അടുത്തുവരെ കോവിഡ്​ കേസുകൾ പ്രതിദിനം റിപ്പോർട്ട്​ ചെയ്​തിരുന്നു.

രാജ്യത്ത്​ ഇതുവരെ 1,00,75,116 പേർക്കാണ്​ കോവിഡ്​ സ്​ഥിരീകരിച്ചത്​. കഴിഞ്ഞ 24 മണിക്കൂറിനിടെ 310 മരണങ്ങളും​ റിപ്പോർട്ട്​ ചെയ്​തു​. ഇതോടെ ആകെ മരണം 1,46,111 ആയി.

മഹാരാഷ്​ട്ര, കർണാടക, ആന്ധ്രാപ്രദേശ്, തമിഴ്‌നാട്, കേരളം എന്നിവയാണ് ഏറ്റവും കൂടുതൽ കോവിഡ്​ റിപ്പോർട്ട്​ ചെയ്​ത സംസ്​ഥാനങ്ങൾ. ഡൽഹി, പശ്ചിമ ബംഗാൾ, മധ്യപ്രദേശ് തുടങ്ങിയ സംസ്​ഥാനങ്ങളിലും കഴിഞ്ഞ 24 മണിക്കൂറിനുള്ളിൽ ഉയർന്ന കേസുകൾ റിപ്പോർട്ട് ചെയ്​തു. ഡൽഹിയിൽ തിങ്കളാഴ്ച 803 പുതിയ കോവിഡ് -19 കേസുകളാണ്​ രേഖപ്പെടുത്തിയത്​. അതേസമയം, തലസ്​ഥാന നഗരിയിൽ ആഗസ്റ്റ് 17ന് ശേഷമുള്ള ഏറ്റവും താഴ്ന്ന നിരക്കാണിത്​.

ബ്രിട്ടനിൽ കൊറോണ ​ൈവറസിന്‍റെ വകഭേദം കണ്ടെത്തിയ സാഹചര്യത്തിൽ ഇന്ത്യയിലും കടുത്ത നടപടികളാണ്​ സ്വീകരിക്കുന്നത്​. മഹാരാഷ്​ട്രയിലെ മുംബൈയിലും മറ്റ് നഗരങ്ങളിലും ജനുവരി അഞ്ചുവരെ രാത്രി 11 മുതൽ 6 വരെ കർഫ്യൂ ഏർപ്പെടുത്തി. യൂറോപ്പിൽനിന്നും ഗൾഫ്​ രാജ്യങ്ങളിനിന്നും വരുന്നവർക്കായി പുതിയ ക്വാറന്‍റീൻ നിയമങ്ങളും പ്രഖ്യാപിച്ചു.

ഇവിടെനിന്ന്​ വരുന്നവർക്ക്​ 14 ദിവസത്തെ ഇൻസ്റ്റിറ്റ്യൂഷനൽ ക്വാറൻറീൻ നിർബന്ധമാണ്​. ബ്രിട്ടനിലേക്കുള്ള വിമാനവിലക്ക്​ വരുന്നതിന്​ മുമ്പായി ഡിസംബർ 22ന്​ അർധരാത്രി വരെ അഞ്ച് വിമാനങ്ങളിലായി ആയിരത്തോളം പേർ ​മഹാരാഷ്​ട്രയിൽ എത്തുമെന്നാണ്​ കണക്ക്​. ഇവരെയെല്ലാം ക്വാറന്‍റീൻ കേന്ദ്രത്തിലേക്ക്​ മാറ്റും.