അദർ പൂനാവാല കൊള്ളക്കാരൻ; സെറം ഇൻസ്റ്റിറ്റ്യൂട്ട്​ കേന്ദ്രസർക്കാർ ഏറ്റെടുക്കണമെന്ന്​ ബി.ജെ.പി എം.എൽ.എ

ലഖ്​നോ: കോവിഡ്​ വാക്​സിൻ വില നിർണയത്തിൽ പ്രതിപക്ഷം ഉൾപ്പടെ പ്രതിഷേധവുമായി രംഗത്തെത്തുന്നതിനിടെ സെറം ഇൻസ്റ്റിറ്റ്യൂട്ടിനെതിരെ വിമർശനവുമായി ഗൊരഖ്​പൂരിലെ ബി.ജെ.പി എം.എൽ.എ രാധ മോഹൻ ദാസ്​ അഗർവാൾ. കമ്പനി സി.ഇ.ഒ അദർ പൂനവാല കൊള്ളക്കാരനാണെന്നും പകർച്ചവ്യാധി നിയമം അനുസരിച്ച്​ സെറം ഇൻസ്റ്റിറ്റ്യൂട്ട്​ കേന്ദ്രസർക്കാർ ഏറ്റെടുക്കണമെന്നും എം.എൽ.എ ആവശ്യപ്പെട്ടു.

പ്രധാനമന്ത്രി നരേന്ദ്ര മോദി, ആഭ്യന്തര മന്ത്രി അമിത്​ ഷാ തുടങ്ങിയവരെ ടാഗ്​ ചെയ്​താണ്​ ബി.ജെ.പി എം.എൽ.എയുടെ ട്വീറ്റ്​. കോവിഷീൽഡ്​ വാക്​സിൻ​ സ്വകാര്യ ആശുപത്രികൾക്ക്​ 600 രൂപക്കും സംസ്ഥാന സർക്കാറുകൾക്ക്​ 400 രൂപക്കുമാണ്​ വിതരണം ചെയ്യാൻ തീരുമാനിച്ചിരുന്നു​. കഴിഞ്ഞ ദിവസമാണ്​ വാക്​സിന്‍റെ പുതുക്കിയ വില നിശ്​ചയിച്ചത്​. ഇതിന്​ പിന്നാലെയാണ്​ ബി.ജെ.പി എം.എൽ.എയുടെ വിമർശനം.

കോവിഡ്​ വാക്​സിൻ ഓപ്പൺ മാർക്കറ്റിൽ വിൽക്കാനുള്ള അനുമതി നേരത്തെ കേന്ദ്രസർക്കാർ നൽകിയിരുന്നു.