േമനക ഗാന്ധി പുഷ്​പാർച്ചന നടത്തിയ അംബേദ്​കർ പ്രതിമ ദലിതർ ‘ശുദ്ധീകരിച്ചു’

വഡോദര (ഗുജറാത്ത്​): കേന്ദ്രമന്ത്രി ​േമനക ഗാന്ധിയും ബി.ജെ.പി മന്ത്രിമാരും പുഷ്​പാർച്ചന നടത്തിയ അംബേദ്​കർ പ്രതിമ ദലിത്​ സംഘടന പ്രവർത്തകർ പാലും വെള്ളവുമൊഴിച്ച്​ കഴുകി ‘ശുദ്ധീകരിച്ചു’. ബി.ആർ. അംബേദ്​കറുടെ 127ാം ജന്മവാർഷികത്തി​​​െൻറ ഭാഗമായാണ്​ കേന്ദ്രമന്ത്രിയും സംഘവും പുഷ്​പാർച്ചനക്കെത്തിയത്​. ഇവരെത്തുംമുമ്പ്​ ആദരമർപ്പിക്കാൻ ഒത്തുചേർന്ന ദലിത്​ സംഘടനകളാണ്​ പ്രതിഷേധവുമായി രംഗത്തുവന്നത്​. 

ബി.ജെ.പി എം.പി രഞ്​ജൻ ബെൻ ഭട്ട്​, മേയർ ഭരത്​ ദംഗാർ, എം.എൽ.എ യോഗേഷ്​ പ​േട്ടൽ എന്നിവരും പ്രവർത്തകരും​ കേന്ദ്രമന്ത്രിക്കൊപ്പമുണ്ടായിരുന്നു. ചടങ്ങ്​ കഴിഞ്ഞ്​ ​േമനകയും സംഘവും മടങ്ങിയ ഉടൻ പ്രതിഷേധക്കാർ പ്രതിമ വൃത്തിയാക്കി. ബി.ജെ.പി നേതാക്കളുടെ സാന്നിധ്യംമൂലം പ്രതിമയും അത്​ സ്​ഥിതിചെയ്യുന്ന ജി.ഇ.ബി സർക്കിളും മലീമസമായെന്ന്​ ആരോപിച്ചായിരുന്നു ശുദ്ധീകരണം.

തങ്ങളാണ്​ ആദരമർപ്പിക്കാൻ ആദ്യം എത്തിയിരുന്നതെന്നും എന്നാൽ, പൊലീസ്​ മന്ത്രിക്കും കൂട്ടർക്കുമാണ്​ ആദ്യം അവസരം നൽകിയതെന്നും ബറോഡ മഹാരാജ സയജിറാവു സർവകലാശാലയിലെ എസ്​.സി/എസ്​.ടി എം​േപ്ലായിസ്​ യൂനിയൻ ജനറൽ സെക്രട്ടറി താക്കോർ സോളങ്കി ആരോപിച്ചു. ദലിത്​ പ്രവർത്തകർ മുദ്രാവാക്യം മുഴക്കിയതോടെ ഇരുവിഭാഗവും തമ്മിൽ വാക്കേറ്റമായി. തങ്ങൾ പ്രതിമക്ക്​ സമീപത്തേക്ക്​ പോയപ്പോൾ പ്രോ​േട്ടാക്കോൾ ചൂണ്ടിക്കാട്ടി പൊലീസ്​ തടഞ്ഞത്​ പ്രവർത്തകരെ പ്രകോപിപ്പിച്ചെന്നും സോളങ്കി പറഞ്ഞു. നേരത്തേ സ്​ഥലത്തുണ്ടായിരുന്ന ബി.ജെ.പി എസ്​.സി/എസ്​.ടി സംസ്​ഥാന സെൽ ജനറൽ സെക്രട്ടറി ജിവ്​രാജ്​ ചൗഹാനെ പ്രതിഷേധക്കാർ തടഞ്ഞുവെച്ചു.