ഭർത്താവ്​ ചങ്ങലക്കിട്ട്​ പീഡിപ്പിച്ച 32കാരിക്ക്​ ആറുമാസത്തിന്​ ശേഷം മോചനം

ന്യൂഡൽഹി: ഭർത്താവിൻെറ ക്രൂര പീഡനത്തിനിരയായി ആറുമാസക്കാലം ചങ്ങലയിൽ ദുരിത ജീവിതം നയിച്ച യുവതിയെ മോചിപ്പിച്ചു. ഡൽഹിയിലെ ത്രിലോകപുരി പ്രദേശത്ത്​ വസിക്കുന്ന 32കാരിയെയാണ്​ വനിത കമീഷൻ രക്ഷപെടുത്തിയത്​.

സ്വന്തം വീട്ടിൽ ഫാൻ പോലുമില്ലാത്ത റൂമിൽ ഭർത്താവിനാൽ തളച്ചിടപ്പെട്ട യുവതിയെ ശുചിമുറിയിൽ പോകാൻ അനുവദിച്ചിരുന്നില്ല. കിടന്ന അതേ സ്​ഥലത്ത്​ തന്നെയാണ്​ മലമൂത്ര വിസർജനം നടത്താൻ വിധിക്കപ്പെടുകയായിരുന്നു​. രക്ഷപ്പെടാൻ ശ്രമിച്ച ഇവരെ പിടികൂടിയ ശേഷം അടിച്ച്​ അവശയാക്കി വീണ്ടും ചങ്ങലയിൽ ബന്ധിക്കുകയായിരുന്നു.

മഹിള പഞ്ചായത്തിലെ പ്രാദേശിക വളണ്ടിയറാണ്​ യുവതിയുടെ അവസ്​ഥ ഡൽഹി വനിത കമീഷൻെറ ശ്രദ്ധയിൽ പെടുത്തിയത്​. സംഭവ അറിഞ്ഞയുടൻ കമിഷനംഗങ്ങൾ പൊലീസിനൊപ്പം സ്ഥലത്തെത്തി യുവതിയെ മോചിപ്പിക്കുകയായിരുന്നു.

മാനസികമായി തളർന്ന അവസ്​ഥയിലായ യുവതിയെ പുനരധിവാസ കേന്ദ്രത്തിലെത്തിച്ചതായും കുറ്റക്കാരനായ ഭർത്താവിനെതിരെ കർശന നടപടി സ്വീകരിക്കുമെന്നും ഡി.സി.ഡബ്ല്യു ചെയർപേഴ്​സൺ സ്വാതി മളിവാൾ പറഞ്ഞു.

ഭർത്താവിനെതിരെ പൊലീസ് കേസെടുത്ത് അന്വേഷണം ആരംഭിച്ചിട്ടുണ്ട്. എന്നാൽ ഭർത്താവ് എന്തിനാണ്​ ഇക്കാര്യങ്ങൾ ചെയ്​തതെന്ന്​ വ്യക്തമല്ല. യുവതിയും പീഡനങ്ങൾക്ക്​ പിന്നിലെ കാരണം തുറന്ന്​ പറഞ്ഞിട്ടില്ല.

11 വർഷം മുമ്പ്​ വിവാഹിതയായ യുവതിക്ക്​ മൂന്ന്​ കുട്ടികളുണ്ട്​. ധാന്യങ്ങൾ പൊടിക്കുന്ന മില്ലിൻെറ ഉടമയാണ്​ ഭർത്താവെന്ന്​ അന്വേഷണത്തിൽ കണ്ടെത്തി. അച്ഛൻ അമ്മയെ സ്​ഥിരമായി മർദ്ദിക്കാറുണ്ടായിരുന്നുവെന്ന്​ മക്കൾ പറഞ്ഞു. മക്കളെയും ഇയാൾ ഉപദ്രവിച്ചിരുന്നു.