ചു​മ​മ​രു​ന്ന്​ ക​ഴി​ച്ച്​ ഉ​സ്ബ​കി​സ്താ​നി​ൽ കു​ട്ടി​ക​ളു​ടെ മ​ര​ണം: ക​മ്പ​നി​ ജീ​വ​ന​ക്കാ​ർ അ​റ​സ്റ്റി​ൽ

ന്യൂ​ഡ​ൽ​ഹി: ഇ​ന്ത്യ​ൻ ചു​മ​മ​രു​ന്ന്​ ക​ഴി​ച്ച്​ ഉ​സ്ബ​കി​സ്താ​നി​ൽ 18 കു​ട്ടി​ക​ൾ മ​രി​ച്ച സം​ഭ​വ​ത്തി​ൽ മ​രു​ന്ന്​ നി​ർ​മി​ച്ച നോ​യ്ഡ​ ആ​സ്ഥാ​ന​മാ​യു​ള്ള മാ​രി​യോ​ൺ ബ​യോ​ടെ​ക്കി​ന്‍റെ മൂ​ന്നു ജീ​വ​ന​ക്കാ​രെ ഉ​ത്ത​ർ​പ്ര​ദേ​ശ്​ പൊ​ലീ​സ്​ അ​റ​സ്​​റ്റ് ചെ​യ്തു.

സെ​ൻ​ട്ര​ൽ ഡ്ര​ഗ്‌​സ് സ്റ്റാ​ൻ​ഡേ​ഡ് ക​ൺ​ട്രോ​ൾ ഓ​ർ​ഗ​നൈ​സേ​ഷ​ന്‍റെ പ​രാ​തി​യി​ൽ മാ​രി​യോ​ൺ ബ​യോ​ടെ​ക്കി​ന്‍റെ ര​ണ്ടു ഡ​യ​റ​ക്ട​ർ​മാ​ർ ഉ​ൾ​പ്പെ​ടെ അ​ഞ്ചു ജീ​വ​ന​ക്കാ​​ർ​ക്കെ​തി​രെ വ്യാ​ഴാ​ഴ്ച രാ​ത്രി എ​ഫ്‌.​ഐ.​ആ​ർ ര​ജി​സ്റ്റ​ർ ചെ​യ്തി​രു​ന്നു. ഇ​തി​നു​ പി​ന്നാ​ലെ​യാ​ണ് മൂ​ന്നു​ പേ​രെ വെ​ള്ളി​യാ​ഴ്ച അ​റ​സ്റ്റ് ചെ​യ്​​ത​ത്.

ഡ​യ​റ​ക്ട​ർ​മാ​ർ ഒ​ളി​വി​ലാ​ണ്. സെ​ന്‍ട്ര​ല്‍ ഡ്ര​ഗ്‌​സ് സ്റ്റാ​ന്‍ഡേ​ഡ് ക​ണ്‍ട്രോ​ള്‍ ഓ​ര്‍ഗ​നൈ​സേ​ഷ​നും ഉ​ത്ത​ര്‍പ്ര​ദേ​ശ് ഡ്ര​ഗ്‌​സ് ക​ണ്‍ട്രോ​ളി​ങ് ആ​ന്‍ഡ് ലൈ​സ​ന്‍സി​ങ് അ​തോ​റി​റ്റി​യും മാ​രി​യോ​ൺ ബ​യോ​ടെ​ക്​ നി​ർ​മി​ച്ച മ​രു​ന്നു​ക​ളു​ടെ സാ​മ്പ്ൾ പ​രി​ശോ​ധി​ച്ച​പ്പോ​ൾ അ​വ​യി​ൽ 22 എ​ണ്ണം മാ​യം ക​ല​ർ​ന്ന​താ​യി​രു​ന്നു​വെ​ന്ന് പ​രാ​തി​യി​ൽ പ​റ​യു​ന്നു. മാ​രി​യോ​ൺ ബ​യോ​ടെ​ക്കി​ന്റെ ‘ഡോ​ക്-1 മാ​ക്‌​സ്’ ചു​മ​മ​രു​ന്ന്​​ ക​ഴി​ച്ച കു​ട്ടി​ക​ളാ​ണ്​ ഡി​സം​ബ​റി​ൽ ഉ​സ്​​ബ​കി​സ്താ​നി​ൽ മ​രി​ച്ച​ത്.