ബ്ലാക്​ ഫംഗസിനെ പകർച്ചവ്യാധിയായി പ്രഖ്യാപിക്കണമെന്ന്​ സംസ്​ഥാനങ്ങളോട്​ കേന്ദ്ര ആരോഗ്യ മന്ത്രാലയം

ന്യൂഡൽഹി: രാജ്യത്ത്​ പുതിയ ഭീതിയായി പടരുന്ന ബ്ലാക്​ ഫംഗസ്​ ബാധയെ പകർച്ചവ്യാധിയായി പ്രഖ്യാപിക്കണമെന്ന്​ കേന്ദ്ര ആഭ്യന്തര മന്ത്രാലയം. കേരളത്തിലുൾപെടെ രോഗം കൂടുതൽ പേരിൽ കണ്ടെത്തിയ സാഹചര്യത്തിലാണ്​ സംസ്​ഥാനങ്ങൾക്ക്​ കേന്ദ്രം നിർദേശം നൽകിയത്​. രോഗനിർണയ, ചികിത്സാ വിഷയങ്ങളിൽ മന്ത്രാലയവും ഐ.സി.എം.ആറും പുറപ്പെടുവിച്ച മാർഗനിർദേശങ്ങൾ എല്ലാ സർക്കാർ, സ്വകാര്യ ആശുപത്രികളും പിന്തുടരണമെന്നും നിർദേശമുണ്ട്​.

തെലങ്കാന, രാജസ്​ഥാൻ സംസ്​ഥാനങ്ങൾ ഇതിനകം ഇതിനെ പകർച്ച വ്യാധിയായി പ്രഖ്യാപിച്ചിട്ടുണ്ട്​.

പ്രകൃതിയിൽനിന്ന്​ പ്രത്യേക ഫംഗസുകൾ ശരീരത്തിൽ പ്രവേശിക്കുക വഴിയാണ്​ രോഗബാധയുണ്ടാകുന്നത്​്​. കോവിഡ്​ മുക്​തരായ രോഗികളിൽ ഇത്​ കണ്ടെത്തിയത്​ അപകടസാധ്യത കൂടുതലാക്കുന്നു. ഡൽഹിയിൽ മാത്രം ഇതുവരെ 130 പേർക്ക്​ ബ്ലാക്​ ഫംഗസ്​ സ്​ഥിരീകരിച്ചിട്ടുണ്ട്​. ചികിത്സ സമയത്ത്​ ലഭിച്ചില്ലെങ്കിൽ അത്യന്തം അപകടകരമാണ്​​.