മരിച്ചെന്ന്​ കരുതി സംസ്​കാരം നടത്തിയ വ്യക്തി ഒരാഴ്​ചക്ക്​ ശേഷം തിരിച്ചെത്തി; സംസ്​കരിച്ചത്​ മറ്റൊരാളുടെ മൃതദേഹം

ജയ്​പുർ: രാജസ്​ഥാനിൽ മരിച്ചതായി കരുതി ബന്ധുക്കൾ സംസ്​കാരം നടത്തിയ വ്യക്തി ഒരാഴ്​ചക്ക്​ ശേഷം തിരിച്ചുവന്നു. ആശുപത്രിയിൽ അഴുകിയ നിലയിൽ കണ്ടെത്തിയ മൃതദേഹം 40കാരനായ ഒാംകാർ ലാൽ ഗഡുലിയയുടേതാണെന്ന്​ കരുതി ബന്ധുക്കൾ സംസ്​കരിക്കുകയായിരുന്നു. എനാൽ ഒരാഴ്​ചക്ക്​ ശേഷം ഒാംകാർ വീട്ടിൽ തിരിച്ചെത്തിയതോടെയാണ്​ മൃതദേഹം മാറിപ്പോയ കാര്യം അറിയുന്നത്​.

രാജസ്​ഥാനിലെ സർക്കാർ ഉടമസ്​ഥതയിലുള്ള ആർ.കെ ആശുപത്രിയിൽ 40കാരനായ ഒരാൾ മരിക്കുകയായിരുന്നു. ആശുപത്രി അധികൃതർ അജ്ഞാതനെന്ന്​ വിലയിരുത്തി പ്രദേശത്തെ പൊലീസ്​ സ്​റ്റേഷനിൽ അറിയിച്ചു. ഒാംകുമാറിനെ കുറിച്ച്​ വിവരം ഒന്നുമില്ലാത്തതിനാൽ അ​ദ്ദേഹത്തി​െൻറ കുടുംബം മരിച്ചത്​ ഒാംകുമാറാണെന്ന്​ തെറ്റിദ്ധരിക്കുകയും മൃതദേഹം ഏറ്റുവാങ്ങി സംസ്​കരിക്കുകയായിരുന്നു. ഗോവർധർ പ്രജാപതാണ്​ ആശുപത്രിയിൽ ചികിത്സയിലിരിക്കേ മരിച്ചത്​.

മദ്യപാനിയായ ഗഡുലിയ കുടുംബത്തെ അറിയിക്കാതെ മേയ്​ 11ന്​ ഉദയ്​പുരിലേക്ക്​ പോകുകയായിരുന്നു. അവിടെയെത്തിയപ്പോൾ അസുഖബാധിതനായ അദ്ദേഹം ആശുപത്രിയിൽ ചികിത്സ തേടി. ലോക്​ഡൗൺ ആരംഭിച്ചതോടെ ഗഡുലിയയുടെ കുടുംബം അദ്ദേഹത്തി​െൻറ സഹോദര​െൻറ വീട്ടിലാണ്​ താമസം.

ഗഡുലിയ ആശുപത്രിയിൽ പ്രവേശിച്ച ദിവസം തന്നെ ആർ.കെ ആശുപത്രിയിൽ പ്രജാപതും ചികിത്സ തേടിയെത്തി. ചികിത്സക്കിടെ അദ്ദേഹം മരിക്കുകയും ചെയ്​തു.

'ആശുപത്രിയിൽനിന്ന്​ മൂന്നുദിവസമായി അജ്ഞാതമായ ഒരു മൃതദേഹം സൂക്ഷിച്ചിരിക്കുന്നുവെന്ന കത്ത്​ വന്നു. മൃതദേഹം തിരിച്ചറിയുന്നതിനായി നിരവധി ഫോ​​േട്ടാകൾ പ്രചരിപ്പിക്കുകയും ചെയ്​തു. മേയ്​ 15ന്​ നിരവധി പേർ മൃതദേഹം തിരിച്ചറിയുന്നതിനായി ആശുപത്രിയിൽ എത്തിയിരുന്നു. ഇതിൽ ഒരു കൂട്ടർ മൃതദേഹം തിരിച്ചറിയുകയും പോസ്​റ്റ്​മോർട്ടം നടത്താതെ മൃതദേഹം വിട്ടുനൽകണമെന്ന്​ അപേക്ഷിക്കുകയുമായിരുന്നു' -കൻക്രോലി പൊലീസ്​ സ്​റ്റേ​ഷ​ൻ എസ്​.എച്ച്​.ഒ പറഞ്ഞു.

തുടർന്ന്​, ഡി.എൻ.എ പരിശോധനയോ പോസ്​റ്റ്​മോർട്ടമോ നടത്താതെ ബന്ധുക്കൾ തിരിച്ചറിഞ്ഞതിനാൽ മൃതദേഹം കൈമാറി. മേയ്​ 15ന്​ അന്ത്യകർമങ്ങൾ നടത്തി സംസ്​കരിക്കുകയും ചെയ്​തു. എന്നാൽ ഒരാഴ്​ചക്ക്​ ശേഷം മേയ്​ 23ന്​ ഗഡുലിയ വീട്ടിൽ തിരിച്ചെത്തിയതോടെയാണ്​ മൃതദേഹം മാറി സംസ്​കരിച്ച വിവരം പുറത്തറിയുന്നത്​. സംഭവത്തിൽ കൃത്യമായ അന്വേഷണം നടത്തി നടപടി സ്വീകരിക്കുമെന്ന്​ ആശുപത്രി അധികൃതരും പൊലീസും അറിയിച്ചു.