ഹാഥറസ്​: യു.പി സർക്കാറിനെതിരെ അന്താരാഷ്​ട്ര ഗൂഢാലോചനയെന്ന് പൊലീസ്​​; കേസെടുത്തു​

ലഖ്​നോ: ഹാഥറസ്​ ബലാത്സംഗ കേസ്​ യു.പി സർക്കാറിനെതിരെ രാഷ്​ട്രീയമായി ഉപയോഗിക്കുകയാണെന്ന്​ ആരോപണം. ഇതുമായി ബന്ധപ്പെട്ട്​ വിവിധ വകുപ്പുകൾ ചുമത്തി പൊലീസ്​ കേസെടുത്തു. രാജ്യദ്രോഹം, അന്താരാഷ്​ട്ര ഗൂഢാലോചന, സമുദായങ്ങൾക്കിടയിൽ സ്​പർധ വളർത്തൽ തുടങ്ങിയവയെ കുറിച്ചെല്ലാം എഫ്​.ഐ.ആറിൽ പരാമർശമുണ്ട്​. സംസ്ഥാനത്തെ വികസനത്തിൽ അസ്വസ്ഥരായവരാണ്​ ഹാഥറസ്​ ബലാത്സംഗത്തെ രാഷ്​ട്രീയമായി ഉപയോഗിക്കുന്നതെന്ന ആരോപണവുമായി മുഖ്യമന്ത്രി യോഗി ആദിത്യനാഥ്​ രംഗത്തെത്തി മണിക്കൂറുകൾക്കകമാണ്​ കേസ്​.

ഹാഥറസ്​ കേസിൽ വലിയ ഗൂഢാലോചന നടക്കുന്നുണ്ട്.​ അന്വേഷണത്തിലൂടെ അത്​ പുറത്ത്​ കൊണ്ടു വരുമെന്ന്​ മുതിർന്ന പൊലീസ്​ ഉദ്യോഗസ്ഥൻ പ്രതികരിച്ചു. നേരത്തെ പെൺകുട്ടിയുടെ വീട്​ സന്ദർശിച്ച ചില പ്രതിപക്ഷ പാർട്ടി അംഗങ്ങൾക്കെതിരെ യു.പി പൊലീസ്​ കേസെടുത്തിരുന്നു. കോവിഡ്​ പ്രോ​ട്ടോകോൾ ലംഘിച്ചുവെന്ന്​ ആരോപിച്ചായിരുന്നു കേസ്​. ​ഹാഥറസ്​ ബലാത്സംഗം യു.പി സർക്കാറിനെതിരെ തിരിക്കാൻ ചിലർ ശ്രമിക്കുകയാണെന്നും ഇതി​െൻറ മറവിൽ ജാതിസംഘർഷമുണ്ടാക്കാനാണ്​ ശ്രമമെന്നും യോഗി പറഞ്ഞിരുന്നു.

ഹാഥറസ്​ കേസിൽ കടുത്ത വിമർശനമാണ്​ യോഗി സർക്കാറിനെതിരെ ഉയർന്നത്​. കേസ്​ അന്വേഷണത്തിലുൾപ്പടെ വൻ വീഴ്​ച സർക്കാർ സംവിധാനങ്ങൾക്ക്​ പറ്റിയെന്ന്​ പ്രതിപക്ഷം ആരോപിച്ചിരുന്നു. പെൺകുട്ടിയുടെ ഗ്രാമത്തിലേക്ക്​ പ്രതിപക്ഷ പാർട്ടി നേതാക്കളെ കടത്തി വിടാത്തതും വിമർശനങ്ങൾക്ക്​ കാരണമായിരുന്നു.