വായുമലിനീകരണം ഗുരുതരം; ട്രക്കുകളുടെ നിരോധനവും വർക്ക്​ ഫ്രം ഹോമും തുടരാൻ നിർദേശിച്ച് ഡൽഹി​ സർക്കാർ

ന്യൂഡൽഹി: ഡൽഹിയിലെ വായുമലിനീകരണം തിങ്കളാഴ്ചയും ഗുരുതരമായി തുടരുന്നു. എയർ ക്വാളിറ്റി ഇൻഡക്​സ്​ പ്രകാരം ഏറ്റവും മോശമായ അവസ്ഥയിലാണ്​ ഡൽഹിയിലെ വായു. ചൊവ്വാഴ്ചയും വായുമലിനീകരണം ഇതേ രീതിയിൽ തന്നെ തുടരുമെന്നാണ്​ പ്രവചനം.

തിങ്കളാഴ്ച രാവിലെ ഡൽഹിയിലെവായുഗുണനിലവാര സൂചികയുടെ തോത്​ 352 ആണ്​. നോയിഡയിൽ ഇത്​ 346 ഗുരുഗ്രാമിൽ 358ഉം ആണ്​. വായുമലിനീകരണം തടയാൻ സ്വീകരിച്ച നടപടികൾ തുടരുമെന്ന്​ ഡൽഹി സർക്കാർ അറിയിച്ചിട്ടുണ്ട്​.

അവശ്യസാധനങ്ങളുമായി എത്തുന്ന ട്രക്കുകൾക്ക്​ മാത്രമാണ്​ ഡൽഹിയിൽ പ്രവേശനാനുമതി നൽകിയിരിക്കുന്നത്​. ജീവനക്കാരുടെ വർക്ക്​ ഫ്രം ഹോം നവംബർ 26 വരെ തുടരുമെന്നും സർക്കാർ അറിയിച്ചു. അതേസമയം, കെട്ടിട നിർമ്മാണ പ്രവർത്തനങ്ങൾക്ക്​ ഏർപ്പെടുത്തിയ വിലക്ക്​ നീക്കിയിട്ടുണ്ട്​. എയർ ക്വാളിറ്റി മാനേജ്​മെന്‍റിന്‍റെ നിർദേശപ്രകാരം സ്​കൂളുകളും കോളജുകളും ഇനിയൊരു ഉത്തരവുണ്ടാകുന്നത്​ വരെ അടഞ്ഞു കിടക്കുമെന്നും സർക്കാർ ഉദ്യോഗസ്ഥൻ പറഞ്ഞു.