കുഞ്ഞുങ്ങൾക്കിടയിലെ കോവിഡ്​ മരണം​ വർധിക്കുന്നു; സംസ്​കരിക്കാൻ സ്​ഥലമില്ലാതെ കുഴങ്ങി ഡൽഹി

ന്യൂഡൽഹി: കേവിഡിന്‍റെ രണ്ടാം തരംഗം അതിരൂക്ഷമായി ബാധിച്ച സംസ്​ഥാനങ്ങളിൽ ഒന്നാണ്​ ഡൽഹി. കോവിഡ്​ മരണങ്ങൾ കാരണം സംസ്​ഥാനത്തെ ശ്​മശാനങ്ങളിലെ നീണ്ട വരികളും തിരക്കും വലിയ വാർത്തയായിരുന്നു. രണ്ടാം തരംഗത്തിൽ നവജാത ശിശുക്കളും കുട്ടികളും മരിക്കുന്ന സംഭവങ്ങളും കൂടി വരികയാണ്​.

ഒരാഴ്ചക്കിടെ ഒമ്പത്​ മാസം പ്രായമായ കൃഷു, അഞ്ച്​ മാസം പ്രായമായ പാരി എന്നീ രണ്ട്​ കുഞ്ഞുങ്ങളെയാണ്​ സീമാപുരി ശ്​മശാനത്തിൽ സംസ്​കരിച്ചത്​. രണ്ടാം കോവിഡ്​ തരംഗത്തിന്​ ശേഷം രാജ്യതലസ്​ഥാനത്ത്​ 2000ത്തിലധികം മൃതദേഹങ്ങൾ സംസ്​കരിക്കാൻ സഹായിച്ച സാമൂഹിക പ്രവർത്തകനും മുൻ നിയമസഭാംഗവുമായ ജിതേന്ദ്ര സിങ്​ ശൗണ്ടി ഈ രണ്ട്​ കുട്ടികളുടെയും മൃതദേഹം ഏറ്റുവാങ്ങവെ കരഞ്ഞുപോയ അവസ്​ഥ വിവരിച്ചിരുന്നു.

'കഴിഞ്ഞ 15 ദിവസത്തിനുള്ളിൽ മൂന്ന് ശിശുക്കളുടെയും ഒരു ഗർഭസ്​ഥ ശിശുവിന്‍റെയും മൃതദേഹങ്ങളാണ്​ ഞങ്ങൾക്ക് ലഭിച്ചത്​. സാധാരണയായി ഞങ്ങൾ കുട്ടികളുടെ മൃതദേഹങ്ങൾ സംസ്‌കരിക്കാറില്ല. ഒന്നുകിൽ അവരെ മറവ്​ ചെയ്യുകയോ അല്ലെങ്കിൽ നദിയിൽ ഒഴുക്കുകയോ ആണ്​ ചെയ്യാറ്​. പകർച്ചവ്യാധിയുടെ സാഹചര്യത്തിൽ കുഞ്ഞുങ്ങളുടെ മൃതദേഹങ്ങൾ നദിയിൽ ഒഴുക്കുന്നത്​ അണുബാധ പടർത്തുമെന്നാണ്​ കരുതുന്നത്' -ശൗണ്ടി പറഞ്ഞു​.

ആദ്യ തരംഗത്തെ അപേക്ഷിച്ച്​ കൂടുതൽ കുട്ടികളാണ് ഇപ്പോൾ​ കോവിഡ്​ ബാധിതരായി ആശുപത്രികളിലെത്തുന്നതെന്ന്​ കണക്കുകൾ വ്യക്തമാക്കുന്നു. മാസങ്ങൾ മാത്രം പ്രായമായ കുഞ്ഞുങ്ങളടക്കം മഹാമാരി പിടിപെട്ട്​ ആശുപത്രിയിൽ ചികിത്സ തേടി എത്തുന്നു.

കഴിഞ്ഞ ദിവസം കോവിഡ്​ ബാധിച്ച്​ മരിച്ച കൃഷുവിന്​ തിങ്കളാഴ്ചയാണ്​ രോഗബാധ സ്​ഥിരീകരിച്ചത്​. ജി.ടി.ബി ആശുപത്രിയിൽ ചികിത്സയിലിരിക്കേ ചൊവ്വാഴ്ച രക്​തത്തിലെ ഓക്​സിജന്‍റെ അളവ്​ 31 ശതമാനമായി (90 ശതമാനത്തിൽ കൂടുതലാണ്​ വേണ്ടത്​) കുറഞ്ഞു. വ്യാഴാഴ്ചയോടെ കുഞ്ഞ്​ മരണത്തിന്​ കീഴടങ്ങി. 18 ദിവസങ്ങൾക്ക്​ മുമ്പ്​ കൃഷുവിന്‍റെ മാതാവിന്​ കോവിഡ്​ ബാധിച്ചിരുന്നു.

അതിന്​ തൊട്ടുമുമ്പാണ്​ അഞ്ച്​ മാസം പ്രായമായ പാരിയും കോവിഡ്​ ബാധിച്ച്​ മരിച്ചത്​. വെന്‍റിലേറ്ററി​ന്‍റെ സഹായത്തോടെ ജീവൻ നിലനിർത്തിയിരുന്ന പാരി ന്യുമോണിയയും ഹൃദയാഘാതവും വന്നാണ്​ മരിച്ചത്​. ശ്​മശാനത്തിന്‍റെ അരികിലായി ഒഴിഞ്ഞുകിടന്ന ഇത്തിരി സ്​ഥലത്താണ്​ രണ്ട്​ കുഞ്ഞുങ്ങൾക്കും അന്ത്യവിശ്രമമൊരുക്കിയതെന്ന്​ ശഹീദ്​ ഭഗത്​ സിങ്​ സേവാദൾ വളണ്ടിയർമാർ പറഞ്ഞു.

കുട്ടികളെ മറവ്​ ചെയ്യാനുള്ള സ്​ഥലപരിമിതി നേരിടുന്നതായാണ്​ സന്നദ്ധ പ്രവർത്തകർ പരാതിപ്പെടുന്നത്​. വലിയ ശ്മശാനങ്ങളായ നിഗംബോദ്​ ഘട്ട്, ഗാസിപൂർ ഘട്ട്​ എന്നിവിടങ്ങളിൽ ശിശുക്കളുടെ മൃതദേഹങ്ങൾ എടുക്കാൻ വ്യവസ്ഥയില്ല.

'കോവിഡ് ബാധിച്ച്​ മരിച്ച ശിശുക്കളുടെയും കുട്ടികളുടെയും മൃതദേഹങ്ങൾ ഞങ്ങൾ എടുക്കുന്നില്ല. ഞങ്ങൾക്ക് അവരെ സംസ്​കരിക്കാനുള്ള സ്ഥലമില്ല. കോവിഡ്​ ബാധിച്ച്​ മരിച്ച കുട്ടികളുടെ ശവസംസ്​കാരത്തിന്​ പ്രത്യേക പ്രോട്ടോക്കോൾ ഇല്ല' -നിഗംബോദ്​ ഘട്ട്​ സഞ്ചലൻ സമിതി ജനറൽ സെക്രട്ടറി സുമൻ ഗുപ്​ത പറഞ്ഞു. ഡൽഹിയിലെ മൂന്ന് മുനിസിപ്പാലിറ്റികൾ ഇപ്പോൾ ശിശുക്കൾക്കുള്ള ശ്മശാനങ്ങൾക്കായി വഴി തേടുകയാണ്.