ഡൽഹിയിൽ ഒമ്പതുവയസുകാരിയുടെ ബലാത്സംഗക്കൊല; പുരോഹിതനടക്കം നാലുപ്രതികൾക്കെതിരെ കുറ്റപത്രം സമർപ്പിച്ചു

ന്യൂഡൽഹി: ഡൽഹി ക​േന്‍റാൺമെന്‍റിന്​ സമീപം ശ്​മശാനത്തിൽ ഒമ്പതുവയസുകാരിയെ ​ക്രൂരമായി ബലാത്സംഗം ചെയ്​ത്​ കൊലപ്പെടുത്തിയ കേസിൽ ഡൽഹി പൊലീസ്​ കുറ്റപത്രം സമർപ്പിച്ചു. ശ്​മശാനത്തിലെ മുഖ്യപുരോഹിതൻ ഉൾപ്പെടെ നാലുപേർക്കെതിരെയാണ്​ ശനിയാഴ്ച ഡൽഹി കോടതിയിൽ ​െപാലീസ്​ കുറ്റപത്രം സമർപ്പിച്ചത്​.

55കാരനായ പുരോഹിതൻ രാധേ ശ്യാം, തൊഴിലാളികളായ കുൽദീപ്​ സിങ്​, സലിം അഹമദ്​, ലക്ഷ്​മി നാരായൺ എന്നിവർക്കെതിരെയാണ്​ 400 പേജ്​ വരുന്ന കുറ്റപത്രം. ഇവർക്കെതിരെ മതിയായ തെളിവുകളുണ്ടെന്നും കുറ്റപത്രത്തിൽ പറയുന്നു.

കൊലപാതകം, കൂട്ടബലാത്സംഗം, തെളിവ്​ നശിപ്പിക്കൽ തുടങ്ങിയ കുറ്റങ്ങളും പോക്​സോ, എസ്​.സി/എസ്​.ടി നിയങ്ങളിലെ വിവിധ വകുപ്പുകളും ചുമത്തിയിട്ടുണ്ട്​. പ്രതികൾ നാലുപേരും ജുഡീഷ്യൽ കസ്​റ്റഡിയിലാണ്​. ആഗസ്റ്റ്​ അഞ്ചിന്​ കേസ്​ ക്രൈംബ്രാഞ്ചിന്​ കൈമാറിയിരുന്നു.

ആഗസ്റ്റ്​ ഒന്നിനാണ്​ കേസിന്​ ആസ്​പദമായ സംഭവം. ഒമ്പത്​ വയസുകാരിയെ ബലാത്സംഗം ചെയ്​ത്​ കൊലപ്പെടുത്തിയ ശേഷം മൃതദേഹം ബലമായി​ സംസ്​കരിക്കുകയായിരുന്നു. ഡൽഹി ക​േന്‍റാൺമെന്‍റ്​ പ്രദേശത്തെ ശ്​മശാനത്തോട്​ ചേർന്നുള്ള പുരാന നംഗലിലെ നിർധന കുടുംബത്തിലെ അംഗമാണ്​ മരിച്ച കുട്ടി. ശ്​മശാനത്തിലെ കൂളറിൽ നിന്ന്​ വെള്ളം കുടിക്കാനായി പോയ കുട്ടി പിന്നീട്​ മടങ്ങി വന്നില്ല.

ശ്​മശാനത്തിലെ പുരോഹിതനായ രാധേശ്യാമിന്‍റെ ചില അടുപ്പക്കാർ വൈകീട്ട്​ ആറ്​ മണിക്ക്​ കുട്ടിയുടെ മാതാവിനെ ശ്​മശാനത്തിലേക്ക്​ വിളിപ്പിച്ച്​ മൃതദേഹം കാണിച്ചുകൊടുക്കുകയായിരുന്നു. കൂളറിൽ നിന്ന്​ വെള്ളം കുടിക്കുന്നതിനിടെ കുട്ടിക്ക്​ ഷോക്കടിക്കുകയായിരുന്നുവെന്നാണ്​ അവർ പറഞ്ഞത്​. കുട്ടിയുടെ കൈത്തണ്ടയിലും മുട്ടിലും പൊള്ളലേറ്റ പാടുകളുണ്ടായിരുന്നുവെന്നും ചുണ്ട്​ നീല നിറമായി മാറിയിരുന്നതായും കുട്ടിയുടെ അമ്മ പറഞ്ഞു.

പൊലീസിനെ വിവരമറിയിച്ചാൽ അവർ മൃതദേഹം പോസ്റ്റ്​മോർട്ടം ചെയ്യുമെന്നും അവയവങ്ങൾ മോഷണം പോകുമെന്നും പുരോഹിതൻ അമ്മയോട്​ പറഞ്ഞു. ഉടനെ മൃതദേഹം സംസ്​കരിക്കണമെന്നും അവരോട്​ ആവശ്യപ്പെടുകയായിരുന്നു.

തങ്ങളുടെ സമ്മതമില്ലാതെ മകളുടെ മൃതദേഹം സംസ്​കരിച്ചുവെന്ന്​ മാതാപിതാക്കൾ പറഞ്ഞതോടെയാണ്​ അയൽക്കാർ വിവരമറിഞ്ഞത്​. ഇതോടെ ശ്​മശാനത്തിന്​ സമീപം നാട്ടുകാർ ഒത്തുകൂടുകയും പൊലീസിനെ വിവരമറിയിക്കുകയും ചെയ്​തു. സംഭവത്തിൽ രാജ്യത്തിന്‍റെ വിവിധ ഭാഗങ്ങളിൽ പ്രതിഷധം ശക്തമായിരുന്നു.