തലസ്​ഥാനത്ത്​ വൻ മയക്കുമരുന്ന്​ വേട്ട: 2500 കോടിയുടെ ഹെറോയിൻ പിടികൂടി

ന്യൂഡൽഹി: തലസ്​ഥാനത്തെ ഞെട്ടിച്ച്​ വൻ മയക്കുമരുന്ന്​ വേട്ട. 2500 കോടി രൂപ വിലമതിക്കുന്ന 354 കി.ഗ്രാം ഹെറോയിനാണ്​ ഡൽഹി പൊലീസ് സ്‌പെഷ്യൽ സെൽ പിടിച്ചെടുത്തത്​. സംഭവത്തിൽ നാലുപേരെ അറസ്റ്റ്​ ചെയ്​തു. ഹരിയാനയിൽ നിന്ന് മൂന്ന് പേരും ഡൽഹിയിൽ നിന്ന് ഒരാളുമാണ്​ പിടിയിലായത്​. സംഘത്തിന്​ അന്താരാഷ്ട്ര മയക്കുമരുന്ന് മാഫിയയുമായി ബന്ധമുണ്ടെന്ന്​ പൊലീസ്​ പറഞ്ഞു.

സ്‌പെഷ്യൽ സെല്ലിന്‍റെ ചരിത്രത്തിൽ ഏറ്റവും വലിയ മയക്കുമരുന്ന് വേട്ടയാണിത്​. കേസിൽ മയക്കുമരുന്ന്​ -തീവ്രവാദ ബന്ധമുണ്ടെന്ന് സംശയിക്കുന്നതായി ഡൽഹി പൊലീസ്​ സ്‌പെഷ്യൽ സെൽ ഉദേയാഗസ്​ഥൻ നീരജ് താക്കൂർ വാർത്തസമ്മേളനത്തിൽ പറഞ്ഞു. ​അഫ്ഗാനിസ്ഥാനിൽ നിന്നാണ് മയക്കുമരുന്ന് കൊണ്ടുവന്നതെന്നും കടലിലൂടെയാണ് മുംബൈയിൽ നിന്ന് ഡൽഹിയിലേക്ക് എത്തിച്ചതെന്നും അദ്ദേഹം പറഞ്ഞു.

മധ്യപ്രദേശിലെ ശിവപുരിക്ക് സമീപമുള്ള ഫാക്ടറിയിൽ വെച്ച്​ മയക്കുമരുന്ന്​ സംസ്ക്കരിച്ച്​ പഞ്ചാബിലേക്ക്​ ​ കൊണ്ടുപോ​കാനായിരുന്നു നീക്കം. ഒളിച്ചുവെക്കാൻ ഫരീദാബാദിൽവീട് വാടകയ്ക്ക് എടുത്തിരുന്നു. സംഘത്തലവൻ അഫ്ഗാനിസ്ഥാനിൽ ഇരുന്നാണ്​ ഇടപാട്​ നിയന്ത്രിക്കുന്നതെന്നും നീരജ് താക്കൂർ പറഞ്ഞു.

മയക്കുമരുന്ന്​ ലോബിക്ക്​ പാകിസ്​താനിൽ നിന്നും പണം ലഭിച്ചതായും സൂചനകളുണ്ടെന്ന് താക്കൂർ പറഞ്ഞു. കഴിഞ്ഞ മാസം ഡൽഹിയിൽ നാർക്കോട്ടിക്​ കൺട്രോൾ ബ്യൂറോ (എൻ‌സി‌ബി) അന്താരാഷ്ട്ര ബന്ധമുളള മയക്കുമരുന്ന് കടത്ത് പിടികൂടിയിരുന്നു. 22 ലക്ഷം സൈക്കോട്രോപിക് ഗുളികകളും 245 കിലോഗ്രാം മയക്കുമരുന്നുകളുമാണ്​ അന്ന്​ പിടിച്ചെടുത്തത്​. സംഭവത്തിൽ എട്ട് പേരെ അറസ്റ്റ് ചെയ്​തിരുന്നു.