കർഷകരെ നേരിടാൻ യുദ്ധസമാന സന്നാഹം; വഴിയിൽ ആണിതറച്ചും 'വാളും പരിചയും' കാട്ടിയും പ്രതിരോധം

ന്യൂഡൽഹി: കർഷകരെ നേരിടാൻ യുദ്ധസമാന സന്നാഹമൊരുക്കി പൊലീസ്​. വഴിയിൽ ആണിതറച്ചും 'വാളും പരിചയും' കാട്ടിയുമാണ്​ കർഷകരെ നേരിടാൻ ഒരുങ്ങുന്നത്​. വാളുകൾ പോലുള്ള നീളൻ വടികളും കൈകൾ മുഴുവനായി മൂടുന്ന ലോഹ പടച്ചട്ടയുമാണ്​ പൊലീസിനായി തയ്യാറാക്കിയിരിക്കുന്നത്​. ട്രാക്​ടറുകൾ കടന്നുവരുന്നത്​ തടയാൻ പാതകളിൽ നീളൻ ആണിതറക്കുന്ന ജോലിയും തകൃതിയിൽ നടക്കുകയാണ്​.

പുറത്തുവന്ന ഒരു ഫോ​ട്ടോയിൽ ഹെൽമെറ്റിട്ട പൊലീസുകാർ റോഡരികിൽ നിൽക്കുന്നതായും അവരുടെ കൈത്തണ്ട മുതൽ കൈമുട്ട് വരെ മറയ്ക്കുന്ന ലോഹ പടച്ചട്ട അണിഞ്ഞിരിക്കുന്നതായും കാണുന്നുണ്ട്​. മറ്റുചില ചിത്രങ്ങളിൽ കോൺക്രീറ്റിൽ നീളൻ ആണികൾ തറക്കുന്നതും പുറത്തുവന്നു. എതിരാളിയെ തടയുമ്പോൾ രണ്ട് കൈത്തണ്ടകളും സംരക്ഷിക്കാൻ അനുവദിക്കുന്ന തരത്തിൽ വലിപ്പമുള്ള കവറിങും​ മെറ്റൽ ലാത്തിയുമാണ്​ കൈവശം വച്ചിരിക്കുന്നത്​.

പുതിയ ഉപകരണത്തിന്‍റെ വിശദാംശങ്ങൾ സംബന്ധിച്ച് ഇതുവരെ ഔദ്യോഗിക സ്ഥിരീകരണമൊന്നും ദില്ലി പോലീസിൽ നിന്ന് ലഭിച്ചിട്ടില്ല. കർഷക പ്രതിഷേധത്തിനിടെ ഹരിയാന അതിർത്തിയിലെ സിംഘ​ുവിൽ വാളെടുത്ത ആളെ കീഴടക്കാൻ ശ്രമിക്കുന്നതിനിടെ പൊലീസുകാരന്​ പരിക്കേറ്റിരുന്നു. ഇതാണ്​ പുതിയ സന്നാഹമൊരുക്കാൻ പൊലീസിനെ പ്രേരിപ്പിച്ചതെന്നാണ്​ സൂചന.